Sesawangan

Sesawangan (basa Indonésia: perumpamaan), lingganipun "sawang", artinipun: mirib, polih pangiring "-an", dados sesawangan, raris kadwipurwayang dados "sesawangan", tegesipun: punapa-punapi ugi sané katon (kacingak), raris kalawatang (karasayang) ring kahiun, mirib sakadi solah kalih kahanan janma (mapawongan), upami: kedapan bunga nagasarine maelogan tempuh angin, kasawangan sakadi tangan anak istri ayu ngulapin.

Conto

Sawangan maartos iribang buka; masawang kuning= mirib sada kuning agigis. Sesawangan puniki ketahipun ngangge kruna: buka, kadi, tan pendah kadi, waluya kadi, luir, alah, amunan.

Ring sor puniki wantah conto sesawangan, luire:

1. Alisne madon intaran, alisne sané sakadi don intaran
2. Bangkiangne acekel gonda layu, suksmanipun: anak luh sané bangkiangne langsing.
3. Buka bulané kalemahan, suksmanipun: kembang lemlem.
4. Jerijine luir bulun landak, suksmanipun: jerijine ane rurus mangancan.
5. Kadi sulur tempuh angin, sulur= entikan bun; sesawangan bangkiang sané lemuh magelohan.
6. Kadi tunjung tan pawarih, suksmanipun: layu dudus.
7. Kaya taru ragas tinibeng wresti, taru ragas= kayu ligir, tinibeng wresti= tepen ujan; suksmanipun: sakadi anake kendel polih kasadian.
8. Kemikane luir madu juruh, suksmanipun: kemikane manis nyujur.
9. Luir nyuh gading kembar, suksmanipun: susuné sané nyangkil putih gading.
10. Paliatne kadi tatit, suksmanipun: cingakan utawi sledetan anak luh sané galak.
11. Baongne mabaong cangak
12. Betekan batisne meling padi
13. Bok gading alah bok jagung
14. Bok jaang alah duk
15. Bungutne alah bungut bubu
16. Cokore mudak sinungsang
17. Galakne buka cicing borosané
18. Gigine cenik-cenik buka gigin semale
19. Gigine nyeri danta
20. Isitne ngembang rijasa
21. Isitne isit cicing
22. Jerijine kadi pusuh bakung
23. Jerijine mulus ngancan
24. Kenehne dekdek lidek kadi gedahe pantigang
25. Kukune mapah biu
26. Latine barak ngatirah
27. Leliate kadi kidang
28. Mata ngonjol buka matan kidange
29. Muane burik kadi tain sampine ujanan
30. Muane kadi umah nyawan
31. Pamulune gading nyalang, kadi emase masangling
32. Praraine mulan purnama

Pupuh Pangkur

Ring Geguritan Megantaka wénten mungguh:

“ Pamargine malonlonan,

nolih kori rakane jua kaesti,
rasanya teka manutug,
nyaup nyangkol ngarasaras,
angin alon mamuat bon bungane arum,
enjunge nyukur katinggalan,
masawang bale kaaksi.

Maabah-abah sarwa endah,
malalangse ombake nene titir,
lumute kasampeh liu,
masawang tikeh makebat,
tur makasur bulung-bulunge ne anyud,
kaange ne pacurenggah,
masawang togog di samping.

”

Pupuh puniki tegesipun: rasanya= manutug; enjunge, masawang: bale; ombake titir, masawang: abah-abah muah langse; bulung-bulunge, masawang: kasur; kaangge pacurenggah, kasawangan: togog.