Rahina Saraswati

Rahina Saraswati inggih punika rahina sané kalaksanayang nyabran nem sasih nemonin rahina Saniscara Umanis Wuku Watugunung. Ring rahina punika makasami krama Hindu Baliné ngaturang sembah bhakti majeng ring Déwi Saraswasti pinaka sang sané ngwetuang kaweruhan ring jagaté puniki tur kapercaya rauh ri tatkala Saniscara Watugunung.

Déwi Saraswati

Patung Saraswati ring jagat India

Déwi Saraswati pinaka sakti saking Déwa Brahma kasimbolang antuk anak isteri sané kalintang ayu. Ida matangi ring ajeng bunga tunjungé. Ida taler madué wahana inggih punika angsa utawi merak. Ring gemelan tangan tengawannyané wénten veena miwah ganitri. Ring gemelan tangan kiwannyané wénten pustaka utawi kitab miwah ngemel veena. Ida pinaka simbol kaweruhan, widya miwah sastra manut ring krama Hindu Bali. Makasami buku, lontar, miwah naskah-naskah sané madaging sastra utawi ajah-ajahan sané luwih, kakaryanin banten ring Rahina Saraswati. Para sisya miwah guru ngaturang sembah ring sekolah soang-soang ri tatkala semengan. Kalanturang antuk ngayabin miwah ngetisin tirta ring buku utawi pustaka kitab sané wénten ring paumahannyané soang-soang.