Mapatung

Mapatung wantah parikrama motong bawi sané kalaksanayang antuk sinarengan olih krama Hindu ring Bali. Mapatung ketah ipun kamargiang ri kalaning nyanggra pamargin rerahinan wiadin piodalan. Daging sané kapolihang, kaanggén negepin sarana upakara wiadin kaajeng ring jero soang-soang. Mapatung kalaksanayang saantukan pangarga bawi majanten mael, napi malih soang-soang kulawarga nenten akéh pisan muatang daging bawi ri kalaning rerahinan. Daging bawi punike kepah sama wibaga, tan wénten magedé-cerikan. Tiosan pinaka cihna panglestarian tetamian anak lingsir, taler kaanggén galah nincapang rasa manyama braya. Antuk mapatung puniki, majanten samian sané nyarengin mapatung prasida ngamolihang daging sané kabuatang, inggian jeroan kantos ring balungipun.