Madé Sugianto
I Madé Sugianto (embas ring Tabanan, 19 April 1979;yusa 44) inggih punika silih tunggil pangawi saking Bali. Ipun meneng ring Banjar Lodalang, Désa Kukuh, Kecamatan Marga, Kabupatén Tabanan.[1] Ipun akéh ngawedar karya ring basa Bali miwah basa Indonésia. Ipun sutindih ring basa miwah sastra Bali. Nika mawinan, ring warsa 2009, ipun ngripta genah penerbitan sané mawasta Pustaka Eksprési. Penerbit puniki akéh ngawedar buku-buku sastra sané mabasa Bali miwah basa Indonésia. Tetujon ipun ngripta genah penerbitan puniki sawiréh akéh sastrawan Bali sané bingung ri kala nerbitang karya-karyannyané. Akéh sastrawan Bali sané karyané katerbitang ring Pustaka Eksprési.
| Madé Sugianto | |
|---|---|
| Embas | 19 April 1979 Banjar Lodalang, Désa Kukuh, Kecamatan Marga, Tabanan, Bali |
| Mabangsa | Indonésia |
| Pakaryan | wartawan Nusa Bali prabekel désa Kukuh |
| Kauningin | pangawi sastra Bali |
Madé Sugianto taler naenin nyalin karya sastra saking Djelantik Santha tur katerbitang ring Pustaka Eksprési. Ritatkala punika, ipun teleb ngaryanin karya sastra Bali modérn. Karya sastran ipun sané kapertama inggih punika satua cutet mabasa Bali sané mamurda "Korsi", cerpén punika kakaryanin ri tatkala wentén pemilihan caleg. Cerpén punika kawedar ring majalah Buratwangi druwén Nyoman Manda. Saking galahé punika, ipun seneng ngawi karya sastra modérn tur akéh nerbitang buku ngantos mangkin. Tiosan punika, ipun taler ngripta majalah Eksprési, Kukuh TV, miwah makarya dados wartawan.
Sesuratan uah
Karya-karya sané sampun kawedar olih Madé Sugianto inggih punika:
- Korsi
- Bikul (2010)
- Preman (2010)
- Sundel Tanah (2010)
- Bunga Valentine (2011)
- Sentana (2011)
- Meong Garong (2012)
- Sing Jodoh (2013)[2]
- Sentana Cucu Marep (2014)[3]
- Ratna Tribanowati (2014)
- Ki Baru Gajah (2015), Pustaka Ekspresi.
- Event Organizer (2016), Pustaka Ekspresi.[4]
- Ngipiang Jokowi (2019), Pustaka Ekspresi.[5]
Ring warsa 2012, ipun ngamolihang Sastra Rancage bidang jasa pengembangan sastra Bali modérn antuk novél mabasa Bali sané mamurda Sentana. Mangkin, Madé Sugianto makarya dados perbekel ring désané, désa Kukuh, Marga, Tabanan. Yadiastun ipun sibuk makarya, ipun tetep ngaryanin karya sastra minakadi ngaryanin cerpén. Cerpén-cerpén ipunné akéh kamedalang ring koran Balipost. Ngantos mangkin, ipun tetep makarya sastra Bali minakadi cerpén, artikel, miwah novél.[6]
Pustaka uah
- ↑ "I Madé Sugianto, Penyebar Minat Buku Berbahasa Bali". Kompas.id (ring Inggris). 2020-04-30. Kaarsipin saking versi asli tanggal 2020-05-11. Kaaksés 2020-08-09.
- ↑ "Sing jodoh:I Madé Sugianto di OPAC Perpustakaan Nasional RI". opac.perpusnas.go.id (ring Indonesia). Kaaksés 2020-06-22.
- ↑ Jaya, Kadek Rama Ariesta (2016). "WACANA PERKAWINAN DALAM NOVEL SENTANA CUCU MAREP KARYA I MADE SUGIANTO : ANALISIS SOSIOLOGI SASTRA". Humanis (ring Indonesia). ISSN 2302-920X.
- ↑ "Évent organizer: pupuan satua Bali modérn:I Madé Sugianto di OPAC Perpustakaan Nasional RI". opac.perpusnas.go.id (ring Indonesia). Kaaksés 2020-06-22.
- ↑ Putu Supartika (2 Pébruari 2020). Irma Budiarti (ed.). "Mantan Kepala SMKN Bali Mandara Raih Hadiah Sastera Rancage 2020 Kategori Sastra Bali" (ring Indonesia). Kaaksés 26 Pébruari 2020.
- ↑ "I Madé Sugianto". Majalah Suara Saking Bali. February 2016. Kaaksés 15 Januari 2020.
