Kuluk Ngempu Rare

Satua Kuluk Ngempu Raré inggih punika silih tunggil satua Bali.

Kuluk Ngempu Raré
Satua
Aran	Kuluk Ngempu Raré
Data
Negara	Indonésia
Wewidangan	Bali

Daging satua

Suba limang tiban makurenan, pangaptinné I Putu ajak Ni Madé mara kaisinin. Sing kodag-kodag liang kenehné disubané embas raré luh. Pianakné adanina Ni Koncréng. Sasukat ento, I Putu ajak Ni Madé mapungkusan Pan Koncréng ajak Mén rarenéKoncréng.

Ipun makadadua tusing ja keweh ngempu pianakné sawiréh ia ngelah kuluk ané andel nyaga raréné.

"Kuluk Tongosin Iluh melah-melah, icang ajak méméné lakar luas ka tegalé ngalap kal jukut", keto Pan Koncréng nunden kulukné apang nyaga pianakné.

"Guk, guk, guk." saut I Kuluk sambilanga ngutaltilang ikutné. I Kuluk ngerti ngresep tekéning pangidihné Pan Koncréng. Sabilang semengan Luh Koncréng kalian luas magaé tekéning memé bapané. Rikala tengai, mara dengokina ka pondok. Mara neked di natah pondokné, Kulukné nyagjagin. "Guk, guk, guk. Nang Koncréng ngentungang mamahan tur ngusudin tendas kulukné. Mén Koncréng nganyonyoin pianakné.

Ri kala Pasah, Pan Koncréng miwah Mén Koncréng luas ka peken. Dinané ento pekené ramé sajan. Ada ané ngaba dagangan, keto masih kramané paseluk mablanja. Dinané ento, Pan Koncréng ajak Mén Koncréng ngaba daganganné ka peken. Apa ja sekayané di tegalanné adepa. Tuah sisaanga anggon ajeng sadina-dina.

"Bli sing nyidang ngaba busung, nyuh, miwah biuné ka peken padidian. Iluh apang milu nimpalin bli ka peken", pangidihné Pan Koncréng tekén somahné.

"Yen icang milu, nyen kal ngempu tur nyaga pianaké di pondok, bli?"

"Serahang tekéning I Kuluk. Kaden ia cicing dueg, satia, tur andel nyaga pianaké".

Semengan ngremeng Pan Koncréng miwah Mén Koncréng luas ka peken. Kuluk melah-melah nyen ngempu pianak icangé Icang ajak méméné kal ké peken ngaba dagangan. Buin jep gagapina bakpao keto pangidih Pan Koncréng tekéning kulukné.

"Guk, guk, guk. saut I Kuluk sambilanga ngutaltilang ikutné. Ipun ngatehang Pan Koncréng miwah Mén Koncréng neked di pagehan pondokné. Disubané joh pajalan Pan Koncréng miwah Mén Koncréngé, Kuluké malipetan mulihan tur nongos di sisin pasarean raréné. Ia satia nyodog di samping rarc ané ngengkis sirep.

Ri kala tengai, Pan Koncréng miwah Mén Koncréng suba majalan mulih ka pondokné. Paliatné bungah sawiréh mulih ngaba bati. Ipun mangrenggotan ngaba beblanjaan. Tusing engsap meliang kulukné bakpao. Sawatara buin molas tindakan neked di pagehan pondokné, kulukné nyagjagin tur ngongkong.

"Guk, guk, guk".

Pan Koncréng maekin tur ngentungang bakpao. Nanging kulukné tusing cara biasané, prajani nyagjagin mamahan ané entunganga. Sawalikné kongkonganné ngancan ngerasang tur nglantangang. Pan Koncréng miwah Mén Koncréng kesiab ningalin bungut kuluké magetih.

"I Luh", keto Pan Koncréng miwah Mén Koncréng makraik.

"Kuluké ngamah pianaké", keto Mén Koncréng nyerit sambilanga ngeling.

Pan Koncréng ngentungang beblanjané tur malaib nyemak saang. Ia jagjagina tekén kulukné sambilanga ningtingang batisné sakadi nangtangin. Plok Pan Koncréng nglanteg kulukné. Kulukné nyregseg tur pungkat. Paliat kuluké ngancan ngendukang sakadi nyelesin raga.

Pan Koncréng miwah Mén Koncréng gageson malaib ka tengah pondokné. Ipun bagia kerana pianakné selamet rahayu. Pianakné ngrenjitang batis miwah limané nyanggra patekan reramané. Memé bapané saling tolih. Mara ipun pedas, ri kala ningalin bangken lelipi woh di natah kamarné. Liu tatu di awak lelipiné. Kuluké nylametang pianaké keto munyiné Pan Koncréng miwah Mén Koncréng. Ipun encol pesu kal ngalih kuluk kasayanganné. Nanging lacur, kulukné suba mati.