Kidung

Kidung utawi Sekar Madia inggih punika reriptan sané nganggén tembang tengahan ring Bali. Kidung kabanda antuk uger-uger kecap wanda miwah labuh suara panguntat sajeroning apada. Kidung tasih kabaos sekar madia, dauaning tembange puniki wénten ring pantaraning sekar alit miwah sekar agunng. Sajeroning nembangan sekar madiane punika, suara wénten ring tengahin lidah. Uger-uger guru sané ngiket sajeroning apada sekar madia wantah: guru wilang utawi uger-uger kecap wanda sajeroning acarik miwah Guru Dingdong utawi uger-uger wangun suara ring panguntat sajeroning acarik.

Kocap masa pangripta kidunge ring Bali sadaweg pamadegan Dalem Waturenggong ring Gélgél, duk abad ke-16 Masehi. Wenten makudang tembang-tembang tengahan sané katami ring Bali rauh mangkin inggih punika: kidung wargasari, kidung tantri, kidung putrusaji, kidung kundangdeya, kidung rereg mengwi, kidung alis-alis ijo, kidung bimaswara, kidung adri, puh jerum, puh demung, miwah sané lianan.