Kebo Dongol

Kebo Dongol silih tunggil dresta sakral, sané kamargiang nyabran nem sasih ri kala piodalan ring Pura Kahyangan Jagat Dhalem Bangun Sakti, Banjar Basang Tamiang, Désa Adat Kapal, Kecamatan Mengwi, Kabupatén Badung. Piodalan nyané ring Budha Wagé Langkir ri kala piodalan Ida Bhatara pacang nyejer tigang rahina .

Desta puniki nganggén piranti utama sekadi kebo sané wantah dados kakaryanin olih Pemangku Pura. Kebo Dongol kakardi saking lakaran ketan sané kahias marupa kebo miwah katancepin sekar pucuk bang, sareng sasana panyangga saking tebu ratu jangkep sareng lakaran nginang punika : basé, pamor, gambir, mako miwah buah pinang, ri kala Puncak Puja Wali punika rahina Buda Wagé Langkir panyungsung saking semeng tangkil nuju pura antuk ngaturang sembah bhakti majeng Ida Bhatara ngantos puput sawatara jam dasa wengi. Jam solas wengi Upacara Pujawali miwah Dresta Kebo Dongol kakawitin, samian Pemangku malinggih ring Balé Pangaruman rumasuk para Serati, pangayah makta Kebo Dongol antuk ngapuja Ida Bhatara guna ngaturang Upacara Pujawali miwah Ritual Kebo Dongol.

Manados dresta sakral punika pangayah sané nyarengjn dudonan dresta puniki nénten dados ngawag-ngawag, minakadi silih tunggil pangayah ring dresta puniki sang makta Kebo Dongol, wantah kamargiang olih lanang krama Désa Pakraman Kapal miwah kamargiang katurun saking sadurungné antuk uger-uger sané kamargiangbsaking dresta puniki kakawitin. Uger-uger sané kanikayang riantara ipun sang makta Kebo Dongol punika krama lanang Désa Pakraman Kapal sané sampun magrihasta miwah warih saking sang makta Kebo Dongol sadurungné. Pinaka wénten pagentosan sang makta Kebo Dongol, asapunika pacang kamargiang upacara ngaraga manados sarana pangukuhan pinaka sané kakait sampun kalugra dados sang makta Kebo Dongol.