Tebu

Tebu inggih punika soroh tetanduran sané medué peséngan ilmiah Saccharum Officianarum L. tur ngranjing ring soroh graminae utawi poaceae inggih punika soroh padang-padangan. Tebu puniki biasané kaanggén makarya gula pasir. Cecirén katik entik tebu puniki buleh lantang, jeg-jeg, mabuku-buku, nénten mecagak, medué matan kuncuk utawi tunas sebilang bukunyané, tur tegehnyané nyantos 1,5 - 3 méter. daging katik tebu puniki mawarna kuning tangi tur medué rasa manis. Madon tunggal, meplahpah, rupanyané lanset, muncuk tur bongkolnyané lanying, sisinyané asah tur ngeres, petulangané jajar, lantangnyané sawetara 50 – 175 cm, lombéngnyané 8 – 12 cm, mawarna gadang. Yéning cingak ring bungannyane, bungan tebu rupanyané putih sawat (malai), tur akeh (majemuk), lantang 30 – 90 cm, benang sari telu, katik putik kalih, muncuk sarinyané mawarna barak masawang tangi, tur putih. akahnyané putih masawang kuning. Kawigunan tebu yéning ring pangusadan, anggén ngubadang nyakitang awak tur ubad nyegerang bayu utawi awak. Yening sarana anggén ubad kokoan, ambil kirang langkung 100 gram katik tebu sané wau maalap, tunu kirang langkung 10 menit. Wusan punika embonang raris kelasin kulitnyané, rereh daging ne, getep cenik-cenik tur pak-pak inem toyané nyantos telas.