I Buta tekén I Rumpuh
Satua I Buta tekén I Rumpuh (aksara Bali: ᵒibutatĕkenaᵒirumpuḥ) inggih punika silih tunggil satua Bali.[1] Satua puniki saduran saking satua Sufi utawi satua lianan saking dura negara.[2] Mirib, satua puniki kasurat saking carita nyata ri antara Muhammad miwah Samir saking Damaskus, Suriah warsa 1889.[3]
| I Buta tekén I Rumpuh | |
|---|---|
| Satua | |
| Aran | I Buta tekén I Rumpuh |
| Data | |
| Negara | Indonésia |
| Wewidangan | Bali |
Daging satua
uahDi désa Anu ada anak tiwas panyamaan ajaka dadua. Ané kelihan buta, ané cerikan rumpuh. Krana ia tuara nyidayang nyemak gawé, jela kenken awai ia tuara madaar. Sedek dina anu ngomong I Rumpuh, “Beli, jalan ja luas ka umah-umah anaké ngidih-ngidih, tusing duga baan icang naenang basangé seduk“.
Masaut beliné, “Kenkenang Beli ngalih ambah-ambahan Beli tuara ngenot apan-apan. Jek cai masih tuara nyidayang majalan awak rumpuh“.
Masaut I Rumpuh, “Kené papineh icangé. Beli tusing ningalin apan-apan, nanging kereng majalan. Batis icangé rumpuh, nanging matan icangé cedang. Yén beneh munyin icangé, gandong icang, icang matujuin Beli ambah-ambahan”. Papineh adiné kabenehang pesan tekén I Buta, lantas ideh-ideh I Rumpuh gandonga ka umah-umah anaké ngidih-ngidih, kanti payu ia madaar.
Makejang anaké kapiolasan, kangen ningalin undikné I Buta tekén I Rumpuh. Ada maang pipis, ada maang nasi, ada maang woh-wohan, ada masih anaké maang lungsuhan panganggo.
Sedek dina anu, I Buta ajaka I Rumpuh buin luas ngidih-idih. Joh koné pajalanné ngliwat désa. Kacrita, di désané ané katuju ento, ada koné sudagar kacang tanah ané kaliwat sugih, nanging lacur tuara ngelah pianak.
Mara ia ningalin kahanan I Buta ajaka I Rumpuh buka ento, lantas metu kenehné kapiolasan lakar nuduk I Buta ajaka I Rumpuh anggona pianak. I Buta ajaka I Rumpuh kendel pesan ajaka ditu, tur ia anteng pesan nulungin melut-melut kacang tanah, ané lakar adepa tekén sudagaré ento. Ditu ia marasa bagia pesan mapan idupné suba katulungan tekén sudagaré ento.
Pustaka
uah- ↑ "Pengetahuan Seni Teater Bali" (PDF). Pébruari 2009. Kaaksés 2020-04-07.
- ↑ "Kisah Bijak Para Sufi: Si Lumpuh dan Si Buta". Républika Online (ring Indonesia). 2012-02-13. Kaaksés 2022-02-04.
- ↑ "Kisah Persahabatan Muhammad Dan Samir, Si Muslim Buta Dan Si Lumpuh Kristen". Tribunpekanbaru.com (ring Indonesia). Kaaksés 2022-02-04.