I Batu Tangis

Satua I Batu Tangis (aksara Bali: ᵒi​batu​taṅis·) inggih punika silih tunggil satua Bali. Satuané puniki madaging pendidikan minakadi, iraga dados pianak nenten dados alpaka kapining mémé lan bapa krana pacang nepukin sangkala. Lianan punika satuané puniki madaging fungsi religius mawinan tokoh ring satuané puniki ngranjing ring tata susila. Satuané puniki tasih madaging makna kontrol sosial. Mawinan prasida ngicenin panampen becik utawi nenten becik majeng tokoh-tokoh ring satuané puniki. Minakadi tokoh I Durmini sané madué parilaksana sané nenten becik krana alpaka kapining méméne. Lianan punika satuané ring duur madaging makna religius, mawinan méméné Durmini nunas ica ring Ida Hyang Widhi mangda panakné kena pastu (kutukan).

I Batu Tangis
Satua
Aran	I Batu Tangis
Data
Negara	Indonésia
Wewidangan	Bali

Satua niki saduran saking legenda Batu Menangis saking Kalimantan Barat.

Daging satua

Di désa anu ada anak tiwas ngelah pianak aukud. Yadiastun ia tiwas, tusing taén ia nyalanang keneh wiadin nyemak gaé ané tuara beneh. Ia melud-melud déwék anggona ngamertanin pianakné di kenkené ia payu madaar madasar aji tuyuh matatulungan tekén nyama braya ento krana liu anaké padalem.

Kacrita jani, pianakné suba menék kelih, madan I Durmini. I Durmini mayus pesan buin kiul. Tusing pesan nyak nulungin méméné magarapan. Tusing taén oraina pianakné nyampat, masain, nyakan miwah ané len-lenan. I Durmini gegaené pragat meseh dogén, ngiyasin dewek, manakadi makatelun méméné tusing maan nyampatang tanahné, pragat depinina. Ia bangun tengai-tengai. Mara bangun ia kiad-kiud dogén nganti ajam makeloné, lantas manjus mersihin dewekné. Panganggon gelahné ané bengil-bengil pragat tumpukangé ngantiang méméné mesahin. Nanging méméné tetep sayang tekén I Durmini. Duaning ia ngelah pianak tuah aukud tusing ada tolih. Peting-peting ngubuhin I Durmini nganti kelih. Apang ada idihina nasi disubané méméné tua.

Kacrita jani I Durmini suba bisa magae. Nanging pagaené telahanga anggona ngitungan dewekne. Sedek dina anu lantas méméné gelem tur tusing nyidayang nyemak gae, pedas méméné sewai-wai tusing madaar. I Durmini ia tusing pesan nyak ngrunguang méméné, mara méméné gelem, I Durmini pragat tusing jumah-jumah. Gelem méméné nyumingkinan ngenehang pianakné tusing jumah-jumah. Suba mekelo ia gelem, lantas mara gigisan, lawan-lawanina ia majalan. Saget tingalina, panakné gagah pesan, nenteng tas, tayungané kadi anak ané tuara kuangan apan-apan. Lantas kendel pesan méméné nepukin pianakné, kanti gelemné rasané ilang.

Suba paek I Durmini tekén méméné, lantas méméné nyapatin, “cening Durmini lakar kija? Nguda cening adi tusing mulih-mulih?”

I Durmini tusing masaut krana lek pesan dewekné ningalin méméné bungkuk sada bengil, mapanganggo brengbeng, lantas ia macegik “ih iba bengil, adi juari pongah iba ngkuin kai pianak, kai tusing ngelah mémé buka kene”.

Lantas mabading tundun lantas majalan méméné nyakit ati ngenehang pamunyin pianakné buka keto. Yadiapin ja pianakné mamunyi keto, méméné tetep masih sayang tur nutug pajalane. Suba paak lantas méméné makaukan “cai cening Durmini nguda cening kimud care ing ngelah mémé bengil, dong antiang ja mémé malu!”.

Masaut lantas Durmini sambilanga majalan “ih megedi iba, kai lek pesan akuina pianak tekén iba, kai tusing ngelah mémé buka kene”.

Sedih pesan méméné, tusing nyidayang naanang sakit atiné lantas pastuna pianakné I Durmini “ratu betara dados asapunika tiang maderbe pianak, moga wasta I Durmini mangda nenten ja mamuwah”. Suud keto lantas I Durmini dados batu. Ditu lantas ia ngeling, ngidih pelih tekén méméne. Duaning suba ulung munyin méméné, kenkenang ngwaliang munyiné buka keto. Kanti jani I Durmini dadi batu gedé. Kéto upah anaké alpaka tekén mémé bapa sinah lakar nepukin sangkala. mémé bapa patutné baktinin.