Barong Landung

Indik Satua, cingak Satua Barong Landung.

Barong Landung inggih punika apasang arca barong sané kasub ring Bali. Krama Bali precaya yéning Barong Landung inggih punika pelawatan Prabu Jayapangus miwah rabinnyané sané maparab Kang Ching Wie. Barong Landung puniki minakadi conto perwujudan akulturasi budaya Cina sareng Hindu Bali.

Miniatur Barong Landung "Jero Gedé" ring Museum Nasional

Barong Landung puniki mawit saking carita Prabu Jayapangus sané dados Prabu ring Balingkang. Ritatkala punika, makéh pedagang Cina sané rauh ka Bali. Drika Prabu Jayapangus kacunduk sareng anak bajang jegeg saking Cina sané maparab Kang Ching Wie, laut kadadosang rabi. Sampun kasuén-suén, Prabu Jayapangus durung kapaicanin putra. Krana punika, Prabu Jayapangus luas matapa ring gunung Batur. Drika wénten Déwi Danu sané seneng sareng Prabu Jayapangus tur ngoda patapan ida. Prabu Jayapangus kagoda, laut nganten sareng Déwi Danu tur madué putra. Sampun sué Kang Ching Wie manyantosang rabinidané sané nénten mawali. Lantas Kang Ching Wie ngrereh Prabu Jayapangus ka patapan idané. Drika, Kang Ching Wie kuciwa krana Déwi Danu ngrebut rabinnyané tur lakar nyerang Déwi Danu. Lantas Déwi Danu ngwales, nanging Prabu Jayapangus melindungi Kang Ching Wie. Nyingakin Prabu Jayapangus sareng Kang Ching Wie bersatu, Déwi Danu kuciwa tur ngwastu makakalih punika dados togog.

Uning tekén orti punika, rakyat Balingkang sebet tur ngaryanin arca barong sané pinaka cihna Prabu Jayapangus sareng rabinnyané. Prabu Jayapangus kacihnayang togog gedé selem magigi ronggoh. Kang Ching Wie kacihnayang togog anak Cina jegeg langsing lanjar sané mamata sipit tur makenyem manis. Rupan Barong Landung puniki nyihnayang rwa bineda, inggih punika ala ayu sané satata madampingan.