Wikipédia

Taman Nasional Bali Kawan

taman nasional ring Indonésia
(Kagingsirang saking Taman Nasional Bali Barat)

Taman Nasional Bali Kawan (Indonésia: Taman Nasional Bali Barat) silih tunggil taman nasional sané magenah ring Kabupatén Buléléng, Bali, Indonésia. Jimbar ipun 190 km2, kadiri antuk 158 km2 tanah miwah sisan ipun marupa segara.[2] Jimbar ipun sawatara 3% saking total jimbar daratan Bali. Ring kalér, punika rumasuk pasisi 1000 méter, terumbu karang miwah gili. Satunggal labuhan ring Gilimanuk magenah ring sisi kawan taman, miwah désa Goris ring sisi kangin. Taman Nasional prasida katempuh saking margi darat saking Gilimanuk miwah Singaraja, utawi nganggén féri saking Ketapang, Jawa Kangin.

Taman Nasional Bali Kawan
tamannasyonalbalikawan·
Taman Nasional Bali Barat
IUCN Kategori II (Taman Nasional)
Jalak Bali ring Taman Nasional
Logo Taman Nasional Bali Barat
Map showing the location of Taman Nasional Bali Kawan
Map showing the location of Taman Nasional Bali Kawan
TN Bali Kawan
Genah saking TN Bali Kawan
GenahBuléléng, Bali, Indonésia
Koordinat8°8′S 114°29′E / 8.133°S 114.483°E / -8.133; 114.483
Jimbar190.02 km2
Kaadegang15 Séptémber 1995
Karauhin5,592 (warsa 2007[1])
Sané NgalolaKamentrian Palemahan Urip miwah Kawanaan
www.btnbalibarat.com

Kawéntenan makudang habitat ring taman nasional, wana sabana, pidada, pagunungan miwah campuhan - masan sabeh, miwah nusa karang.[3] Kepahan tengah taman kadominasi olih sisan-sisan papat gunung vulkanik saking aab Pléistosén, antuk puncak pinih tegeh ring Gunung Patas 1412 méter.

Lelintihan

uah
 
Satunggil Samong kamatiang olih M. Zanveld, warsa 1920-an.

Pawikan paksi asal Inggris Baron Stressmann ngacunduk paksi Jalak Bali ring 24 Maret 1911. Pacundukan punika kapersidayang ri kala Kapal Ékspédisi Malaku II sané makta para panilik kapaksa malabuh ring Singaraja sué nyané 3 sasih. Ida ngacinduk sebaran Jalak Bali ngawit saking Désa Bubunan nganti Gilimanuk. Rikala duk punika wéten panyatusan sané kakepah dados akéh sekaa. Menawi, nyabran warsa wawengkon pasebaran paksi Curik Bali puniki nyansan nyupekang. Sairing akéh populasi nyané nyansan susut, palestarian Jalak Bali terus kapacu.[4]

Lelintihan pangadegan Taman Nasional Bali Kawan kakawitin saking warsa 1947. Ri kala punika saking Kaputusan Déwan Raja-Raja ring Bali Nomor E/1/4/7/47 tanggal 13 Agustus 1947 indik panetapan wawengkon Taman Pelindung Alam Bali sané ngajangkepin Banyuwédang antuk jimbar 19.365,8 héktar.

Ring warsa 1970 medal kaputusan kakait status burung Bali (Leucopsar rothschildi) mawit Surat Keputusan Menteri Pertanian No. 40/Kpts/Um/8/1970 pinaka Curik Bali kanikayang manados paksi langka sané mastatus kasaibin

Warsa 1982, wawengkon wana Bali Kawan katunjuk manados calon Taman Nasional. Langkung dasa warsa mataki-taki, ring 15 Séptémber 1995, ring pamuput nyané katetapang resmi mawit Surat Keputusan Menteri Kehutanan No. 493/Kpts-II/95 ngadegang taman nasional maaran resmi Taman Nasional Bali Barat antuk jimbar 19.002,89 ha[5]

Tatujon pangelolaan Taman Nasional Bali Kawan (TNBB) luiré:[6]

  1. Pasaiban populasi Jalak Bali taler ékosistem liyanan minakadi ékosistem terumbu karang, ékosistem mangrove, ékosistem wana pasisi miwah ékosistem wana daratan éndép ngantos pagunungan. Dados sistem panyangga kauripan kautama katujuang antuk ngajaga kaaslian, kagenepan miwah kaakéhan soroh suksési palemahan ring unit-unit ékosistem sané mantep miwah prasida ngadukung kauripan sané becik.
  2. Pangawetan kaakéhan soroh éntikan miwah beburon taler ékosistem nyané katujuang antuk nyaibin, ngulihang keaslian, ngembangang populasi miwah kaakéhan soroh génétik ring wawengkon TNBB saking gulgulan manusa.
  3. Pawigunaan sacara lestari Wit Wasa Palemahan miwah Ékosistem nyané katujuang antuk makudang pawigunaan minakadi:
    • Dados laboratorium lapangan panilik antuk pangembangan kawinanan miwah téknologi.
    • Dodos genah pangajahan antuk kabuatan munggahang pawikanan miwah katrampilan antuk para krama.
    • Objek wisata ring wawengkon khusus pawigunaan sané prasida kawangunin fasilitas pariwisata.
    • Nunjangin budidaya panangkaran soroh entikan miwah beburon ring paindikan ngisinin kaperluan protéin, buron anggonan miwah entikan ubad-ubadan.

Géograpi

uah

Topograpi

uah

Topograpi taman nasional madaging dataran landai (makéhan asah), dalem akedik, antuk kategehan genah riantara 0 s.d 1.414 mdpl. Wénten 4 gunung ring taman, punika Gunung Prapat Agung tegehné ± 310 mdpl, Gunung Banyuwédang ± 430 mdpl, Gunung Klatakan ± 698 mdpl miwah Gunung Sangiang sané pinih tegeh ring ± 1002 mdpl. Ring patoyan segara wénten 4 nusa miwah gili sané rumasuk wawengkon TN punika Nusa Menjangan ± 175 Ha, Gili Burung, Gili Gadung, miwah Gili Kalong.[7][8]

Tanah miwah Géologi

uah

Soroh tanah ring wawengkon Taman Nasional Bali Kawan matios-tiosan. Paindikan punika krana watuan ina pawentuk nyané nénten je pateh. Mawit peta soroh tanah Pulo Bali, soroh-soroh tanah ring wawengkon puniki ngacangkupin aluvial, latosol, miwah méditéran. Mawit Peta Tanah Tinjau P. Bali skala 1 : 250.000 (Pola Rehabilitasi Lahan dan Konservasi Tanah Wilayah DAS Pancoran, Teluk Terima, Balingkang Anyar Unda dan Sema Bor) warsa 1984. Formasi géologi, TNBK makéhan marupa Latosol.

Hidrologi

uah

DAS : Burung, Kalong, Menjangan, Pangkung Awen, Tukad Bajera 1, Tukad Bajera 2, Tukad Lembah Berumbun, Tukad Lembah Lampu Merah 1, Tukad Lebah Lampu Merah 2, Tukad Melaya, Tukad Sumbersari, Tukad Teluk Terima, Tukad Tenggulun, Tukad Tenggulun 2

Iklim

uah

Mawit klasifikasi iklim Schmidt miwah Ferguson, wawengkon Taman Nasional Bali Kawan rumasuk ring iklim E antuk rerata curah sabeh sawatara 1480 mm/warsa taler madué kaayuban sawatara 0–85% miwah Temperatur ngasasih wawengkon suhu sawatara 15–30 °C.

Satwa miwah Entikan

uah
 
Taman nasional pinaka bénténg pinih untat saking Jalak Bali

Sawatara 160 spésiés beburon wénten ring taman puniki. Mamalia rumasuk banteng, menjangan, kidang ketah, pétu, celeng alas, bukal ageng miwah méong kuwuk. Paksi termasuk sikep lelipi bido, bangau bluwok, cabak kota, sesapi lumbung, sesapi batu, Cecropis daurica, Hemiprocne coronata, Eurystomus orientalis, Clalongan, gelatik jawa, bangau tongtong, bentet klau, Tangkar cetrong, cekakak suci, pekakak mas, crukcuk merbah miwah sanget kaancem punah Jalak Bali. Réptil termasuk penyu sisik miwah alu. Ring Juni 2011, Taman Nasional Bali Kawan kaica petang dasa Jalak Bali sané kalébang saking Kebun Beburon Surabaya miwah kalih dasa saking Taman Safari Indonésia.[9]

Soroh entikan sané kauningin mentik ring taman nasional puniki luiré: Pterospermum diversifolium, Antidesma bunius, Lagerstroemia speciosa, Stelechocarpus burahol, Santalum album, Aleurites moluccanus, Sterculia foetida, Schleichera oleosa, Dipterocarpus hasseltii, Garcinia dulcis, Alstonia scholaris, Manilkara kauki, Dalbergia latifolia miwah Cassia fistula.[10]

Punah

uah
  • Samong pinih untat kacutet ring Bali Kawan warsa 1930-an.[11]

Pikobet

uah

Ring wawengkon taman nasional kantun akéh anak sané mamaling taru utawi illegal logging, ring warsa 2018 wénten 109 héktare sané karusak daweg parilaksana punika. Paindikan punika dados sané ngaranayang blabar ring Kabupatén Jembrana miwah Buléléng nyabran warsa ritatkala masan sabéh. Wana sané rusak ring dulu puniki nénten je mawiguna sekadi sepatutné krana illegal logging punika, napi malih ritatkala blabar taru glondongan ageng saking illegal logging punika kaangkat olih toya tur ngaranayang rusak kreteg umah miwah ngalangin margi.[12][13]

Ring sisi liyanan saking ékosistem ipun, satwa ring taman nasional taler kaancem olih paborosan liar, kautama saking soroh-soroh paksi sané madué aji ring pasar, curik punika dados komoditas utama krana aji nyané sané tegeh ring pasaran. Akéh paboros ngandelang éngket antuk ngejuk paksi-paksi ring taman mangda dados kaadol malih.[14]

Cingak taler

uah

Galéri

uah
  •  
    Peta Taman Nasional Bali Kawan
  •  
    Nusa Menjangan ring sisi kalér taman nasional
  •  
    Pidada ring Taman Nasional Bali Kawan

Pustaka

uah
  1. ↑ Statistik Kehutanan Indonesia 2007 Archived 2011-07-22 at the Wayback Machine, kaakses 20 Méi 2010
  2. ↑ "Tentang Kami « Taman Nasional Bali Barat (Bali Barat National Park) – Taman Rekreasi, Jalak Bali, Penelitian, Pariwisata". Tnbalibarat.com. Kaarsipin saking versi asli tanggal 2012-12-09. Kaaksés 12 Juli 2013.
  3. ↑ Kementerian Kehutanan: Taman Nasional Bali Barat Archived 2013-12-07 at the Wayback Machine, kaakses 13 Oktober 2010
  4. ↑ "Taman Nasional Indonésia | Taman Nasional Bali Barat" (ring Indonesia). Kaarsipin saking versi asli tanggal 2022-08-02. Kaaksés 2022-07-29.
  5. ↑ Taman Nasional Bali Barat, Rimba Kita, kaaksés 22 Juni 2021
  6. ↑ Unknown (Senin, 24 Pébruari 2014). "Konservasi Bali Barat: Taman Nasional Bali Barat". Konservasi Bali Barat. Kaaksés 2022-07-29. Check date values in: |date= (help)
  7. ↑ Rani; Murtafiah; Zakiyah; Benardi, Sri; Murtafiah; Neza; Andi Irwan (2019). "Motif Awan (Model Partisipatif Wisatawan) Sebagai Solusi Konservasi Hutan Evergreen di Taman Nasional Bali Barat". Edu Geography. 7: 188–197.CS1 maint: multiple names: authors list (link)
  8. ↑ Triyulianti; Ampou; Sidik; Pradisty, Iis; Eghbert Elvan; Frida; Novia Arinda; (Séptémber 2020). "Kondisi perairan dan ekosistem pesisir di Kawasan Konservasi Bali Barat". Sumber Daya Laut dan Pesisir Perairan Selat Bali: 1–25.CS1 maint: extra punctuation (link) CS1 maint: multiple names: authors list (link)
  9. ↑ "Surabaya zoo releases 40 endangered birds into Bali national park", Waspada Online, 18 Juni 2011
  10. ↑ "West Bali National Park - Indonésia Travel". www.Indonésia.travel (ring Inggris). Kaaksés 2022-07-30.
  11. ↑ Jackson, P.; Nowell, K. (2008). "Panthera tigris ssp. balica". IUCN Red List of Threatened Species. IUCN. 2008. Unknown parameter |name-list-style= ignored (help)CS1 maint: ref=harv (link)
  12. ↑ Tabelak, Donny (2018-12-15). "Bali Barat Dalam Ancaman, 109 Hektare Hutan Mulai Kritis Karena Ini…". Radar Bali (ring Indonesia). Kaaksés 2022-10-21.
  13. ↑ Tabelak, Donny (2022-10-20). "Diduga karena Kerusakan Hutan di Jembrana, Kayu Berukuran Besar Terbawa Banjir Bandang". Radar Bali (ring Indonesia). Kaaksés 2022-10-21.
  14. ↑ "Berburu Burung di Sekitar Sarang Burung Jalak Bali, Tiga Pemburu Diamankan TNBB". Tribun-bali.com (ring Indonesia). Kaaksés 2022-10-21.

Pranala jaba

uah
Kapolihang saking "https://ban.wikipedia.org/w/index.php?title=Taman_Nasional_Bali_Kawan&oldid=176888"