Pura Ulun Suwi Tegallalang

Pura Ulun Suwi Tegallalang druén Subak Gedé Langkih Tegallalang magenah ring Banjar Gagah, Désa Tegallalang, Kecamatan Tegallalang, Kabupatén Gianyar, Bali. Pura Ulun Suwi inggih punika silih tunggil pura sané kawangun ring genah subak utawi pupulang makudang-kudang subak sané nganggén embahan toya sané pateh. Pura Ulun Suwi mawit saking kruna ulu sané mateges luhur miwah suwi sané mateges sawah, carik, utawi toya. Malarapan antuk punika Pura Ulun Suwi madué piteges Uluning Sawah utawi genah utama indik karahayuan. Pura Ulun Suwi puniki taler pinaka palinggih utawi pura sané wénten ring genah kapertama toya medal saking bendungan sané selanturnyané kaembahang ka soang-soang carik malarapan antuk temukuaya.

Pura Ulun Suwi Tegallalang kaamong oleh limang subak inggih punika Subak Sukabaya, Subak Langkih, Subak Umadalem, Subak Telunayah, miwah Subak Kraman. Pura puniki pinaka genah ngamargiang upacara sekaa subak sekadi maguru piduka, nangluk merana, miwah upacara sané lianan. Maguru Piduka inggih punika upacara majeng Ida Sang Hyang Widhi Wasa sané maprabawa Sang Hyang Siwa sané matetujon nunas pangampura tur kaselametan ritatkala wénten pamargi sané iwang ring sajeroning magarapan ring sawah. Nangluk merana inggih punika upacara sané matetujon nunasang saluiring tetanduran mangda nénten karusak olih merana sinah prasida mupu nyabran warsa.

Wénten makudang-kudang palinggih sané wénten ring Pura Ulun Suwi sekadi, palinggih piasan pinaka genah ngenahang sarana upacara; Pelinggih Rare Angon pinaka sarana ngaturang bakti ring Ida Sang Hyang Widhi Wasa sané maprabawa Sang Hyang Raré Angon; Pelinggih Pengulun Subak; miwah Padmasari.