Pura Parahyangan Agung Jagatkarta

Pura Parahyangan Agung Jagatkarta utawi kasengguh Pura Jagatkarta inggih punika silih tunggil pura agama Hindu Nusantara sané magenah ring Bogor, Jawa Barat, Indonésia. Sasampun kawangun, pura puniki satmaka pura sané pinih ageng ring Indonésia sasampun Pura Besakih sané magenah ring Pulo Bali. Pura Jagatkarta pinaka pura sané kaanggén mamuja Prabu Siliwangi miwah para hyang saking Pakuan Pajajaran sané naenin ngadeg ring wewidayang Parahyangan.

Pura Parahyangan Agung Jagatkarta
Kori utama Pura Jagatkarta
Inpormasi umum
Tipe	Pura
Pakem Undagi	Bali
Genah	Tamansari, Bogor, Jawa Barat
Negara	Indonésia
Koordinat	6°40′11″S 106°44′07″E

Genah

Pura Jagatkarta magenah ring bongkol Gunung Salak, Ciapus, Kecamatan Tamansari ring Kabupatén Bogor. Pura puniki kawangun ring Gunung Salak duaning kocap drika ngadeg Pakuan Pajajaran satmaka ibukota Keraton Sunda Galuh. Keraton punika pinaka keraton Hindu pinih untat ring Nusantara sareng Majapahit sané prasida ngamolihang masa keemasan ri kala Prabu Siliwangi dados raja sadurung katundukang olih Muslim Jawa duk masa ka-16. Genah Pura Jagatkara taler manut saking genah Prabu Siliwangi miwah para parekannyané ngamolihang moksa. Taler ngadeg Candi antuk patung sangmong mawarna putih miwah selem (cihna Prabu Siliwangi) pinaka penghormatan ring Keraton Pajajaran, Keraton pinih untat ring tanah Parahyangan. Makudang-kudang peninggalan Pajajaran mangkin kasimpen ring Museum Nasional Indonésia ring Jakarta. Margi saking Gunung Salak ngantos Pura Jagatkarta kawangun ngawit saking warsa 1995 ngawinan nénten méweh tangkil drika nganggén montor. Ri kala upakara Ngenteg Linggih, akéh pamedek sané tangkil kaPura Jagatkarta ngantos majalan doh saking tongos parkir.