Patung Déwa Murugan

Déwa Murugan utawi sane dados kasinggihang antuk Déwa Subramannya taler dados kapasengan antuk Déwa Kartikeya. Inggih punika wantah silih sinunggil putran Ida Sang Hyang Siwa tiosan ring Déwa Ganesha. Ring Bali, katah kaparabang Bhatara Kumara. Ida wantah dewataning ksatrya sane maduwe kasaktian miwah jnana sane nincap. Yening kacingak antuk caritane, Déwa Murugan wantah makeh kapuja antuk krama Hindu pamakasnyane majeng semeton saking wangsa Tamil. Puniki katah kapanggih ring Bharatawarsa tur sane sampun ngalimbak ring Batu Caves, Malaysia.

Wentuk Déwa Murugan

Ring Bharatavarsa, Déwa Murugan kasobyahang pinaka dewa sane wimuda tur kabhinawa rupan idane kalangon sane nyingakin Déwa Murugane punika. Ring pawimbane, ida satata kasobyahang angrangsuking busana kaprajuritan. Punika taler Ida sergep saha sanjata, minakadi:

1. Vel (tombak): wantah sanjata sane katah taler kaparab lembing. Sami kauripan manusane ring jagate nganggen sanjatane puniki. Kawigunanipun wantah kaanggen antuk mayudha, maboros utawi maburu, miwah sane tiosan.
2. Gada: manut saking KBBI Daring wantah sanjata sane kakaryanin antuk datu utawi logam. Kawigunannyane wantah kaanggen ngebug satrune.
3. Cakra: yening karerehang ring mitologi Hindu, cakra wantah sanjata sane prasida muter ring selaning jeriji. Karerehang malih sane katah nganggen wantah Ida Sang Hyang Wisnu.
4. Busur: busur puniki wantah piranti mayudha sane nganggen anak panah.

Ida sane magamel antuk sanjatane puniki taler kasobyahang antuk prerai sane kakapah antuk enem widang miwah roras hasta. Pinaka wahanan Idane, Merak wantah kasaratang antuk panganggene punika taler kasarengin antuk lelipi sane wenten pinaka pagandan Ida.

Kawigunan

Déwa Murugan kapuja antuk kawibhawan ida sane mapakilitan antuk guna utawi kawigunan Idane. Bhaktane sami nyatpada tur muja kawentenan Ida sumangdane prasida ngicalang tatiga kapialang manusane ring jagatpadane mangkin, inggih punika: Karma, Maya miwah Ahamkara. Karma punika wantah parilaksana manusa sane wenten ring jagate, Ida katunasang mangdane sida ngalimbakang karma sane becik kakaryanin olih manusane sami. Maya punika wantah wayangan sane prasida ngawinang anake nenten teteg, puniki patut kaicalang mangda napi sane kapikenohang nenten sida lempas saking tetuek sami. Kaping untad wantah ahamkara, inggih punika kalobhan sane nyungsup sami telenging kayun. Yening katigane werdi nuju kakaonan, puniki sane prasida manusane nenten sida maperang, perang puniki nenteja perang fisik, punika wantah perang saking adharmane.

Sira sane muja, muji tur subhakti majeng Ida Déwa Murugan pastika kanugrahin antuk kawiryan, kasatyan, kawidyan, cecep ring sahananing pakaryan, kawicaksanan, wiweka, miwah sami sane becik ring jagat tigane puniki, Ring kosmologi Hindu, Déwa Murugan ngawesayang Planet Mars saha sami Danawane. Planet Mars kauningin maduwe iyus sane nenten becik ring jagate, punika taler yening manusane prasidha subhakti majeng Ida Déwa Murugan, punika taler sida ngirangin iyus sane rauh saking Planet Mars sane singsal pamarginne antuk Rta. Mangdane napi sane kaunggahan katerima antuk Ida, manusane mautsaha antuk ngawentenang Yajnya. Makudang-kudang yajnyane punika sakadi Homa Yajnya sane mapirantiantuk gnine. Homa puniki kaunggahang kasarengin antuk Puja Pangrastiti