Pancoran Solas

Pancoran Solas, pinaka pasiraman suci Ida Bhatara Dalem Dimadé sané magenah ring Désa Pakraman Guliang Kangin utawi ring wawidangan Désa Dinas Taman Bali, Kecamatan Bangli, Kabupatén Bangli. Pancoran Solas puniki kawangun kirang langkung warsa 1665M, ritatkala Raja Bali kaping kutus sané maparab Ida Dalem Dimadé magenah ring jagat Tambangwilah riantukan wénten biuta ring Puri Gélgél.

Pancoran Solas
Pasiraman Pancoran Solas Desa Guliang Kangin
Inpormasi umum
Tipe	Pasiraman
Pakem Undagi	Bali
Genah	Desa Pakraman Guliang Kangin, Kabupatén Bangli
Margi	Taman Bali, Bangli, Kabupatén Bangli, Bali 80661
Koordinat	8° 30' 57.41" S, 115° 21' 24.04" E -8.515949, 115.356676

Pancoran Solas kasengguh prasida ngawetuang kénak ring kahyun madasar antuk carita gumanti Ida Dalem Dimadé, marasa seneng tur liang sasampun saraina masiram ring pancoran puniki. Carita puniki mapaiketan ring kawéntenan jagat Guliang madasar antuk Ida Dalem kasengguh Liang, raris jagat puniki kagentosin aran, ngawit mawasta Désa Tambahwilah dados Désa Guliang.

Pancoran Solas kawangun antuk 11 pancoran, Asiki pancoran ring baduur sané kanggén tirta upacara, tur dasa pancoran sané betén kaanggén genah malukat, ngicalang sahananing mala sekala-niskala. Dasa Pancoran pinaka dasa aksara (Sa Ba Ta A I Na Ma Si Wa Ya), sané wénten ring angga sarira manusa sami. Nyuciang dasa aksara ring buana alit jaga ngawetuang kénak, sadia lan rahayu.

Tata Cara Malukat ring Pancoran Solas

1. Pemedek sane cuntaka nenten kangkat ngeranjing ring pancoran solas;
2. Pemedek mangda makta bhakti kekalih, asiki unggahang ring padmasana katurang ring muspa sesampun malukat. Yening nenten wenten pejati kangkat ngangge canang sari. Bhaki pejati kaastawayang olih jro mangku, yening nenten wenten jro mangku kangkat kaastawayang olih suang-suang pemedek antuk pinunas sane kabuatang;
3. Pemedek sane durung masiram/mekramas mangda masiram ring genah masiram i sane sampun kasediaang;
4. Malukat ring pancoran sane beten, ngawit saking pancoran nomer 1 (sisi pinih kaler/sisi tengen saking pemedek malukat) ngelantur ke kiwa nyantos pancoran nomer 10;
5. Malukat ring suang-suang pancoran kakawitin antuk nunas wara nugraha ida bhatara sane meteja ring suang-suang pancoran, raris kesugiang pang 3, mekemuh pang 3, katunas pang siki, tur ngaturang parama dewa suksma;
6. Sesampun wus malukat. Raris megentos busana ring genah megentos, jagi ngaturang pamuspan;
7. Pamuspan kaenter antuk jro mangku, pemedek nenten kangkat muspa ring wewidangan kelebutan. Pemedek muspa ring genah sane sampun kecumawis. Ritatkala nenten wenten jro mangku, pamuspan kangkat kemargiang suang suang pemedek;
8. Sesampun puput muspa, sesarin bhakti mangda karanjingan ring genah sesari;
9. Pemedek sane jaga ngaturang punia ring ida bhatara sane pacang kaangege nitenin pancoran solas mangda nyurat ring buku punia. Tur ngranjingang jinah ring genah dana punia;
10. Pemedek mangda ngutang leluwu ring genah sane sampun kasiagaang;
11. Pemedek nenten kangkat ngusak-asik sahananing kawentenan ring pancoran solas. Taler nenten kangkat melinggih ring ring pengancan undang;
12. Nunas pengampura pang banget yening wenten iwang penyanggra utawi wenten sane nenten manut ring pakahyunan.

Galéri

• 
• 
• 
• 
• 
• 
• 
•