Museum Nyoman Gunarsa
Museum Nyoman Gunarsa inggih punika silih tunggil museum sané wénten ring Bali. Museum puniki magenah ring Désa Takmung, Kecamatan Banjarangkan, Kabupatén Klungkung. Mawit kakaryanin saka kidik duk warsa 1990 tur kaurus olih Yayasan Seni Lukis Klasik Bali. Sane ngaryanin tur nuwenang museum puniki nenten tios wantah seniman mawasta I Nyoman Gunarsa. Museum puniki karesmiang duk warsa 1994 olih Menteri Pariwisata miwah Kebudayaan daweg punika, Wardiman Djoyonegoro. Museum Nyoman Gunarsa madaging makudang-kudang imba seni Bali klasik minakadi marupa lukisan, wayang kulit, ukiran miwah patung. Koleksi-koleksi punika wénten sané yusané lintang saking satus tiban. Punika mawinan wénten koleksi-koleksi ring museum puniki sané kadadosang benda Cagar Budaya olih Pemerintah Kabupatén Klungkung.[1] Lianan ring lukisan klasik Bali, museum puniki taler madué koleksi lukisan modern seniman Bali. Akeh lukisan sané wénten ring museum puniki sawatara satak seket lukisan.[2] Ring wewidangan pinih ajeng sané marupa aula kawastanin Surya Chandra Murti. Ring genah puniki wénten arca Dwarapala sané akehnyane apasang, ornamen Kala Makara tigang siki, miwah lukisan timbul Subali miwah Sugriwa. Ring wewidangan Surya Chandra Murti puniki taler wénten Prasasti Peresmian Museum Seni Lukis Klasik Bali warsa 1998 sané kalinggatanganin olih Gubernur Bali Ida Bagus Oka, Prasasti Visit Museum Year warsa 2010 sané kalinggatanganin olih Menteri Kebudayaan miwah Pariwisata daweg punika, miwah Prasasti Peringatan Dasa Warsa Museum Nyoman Gunarsa.[3]
 Kori ring museum | |
| Kaadegang | 2 Juni 1994 |
|---|---|
| Genah | Jalan Banda, No. 1, Désa Takmung, Kecamatan Banjarangkan, Kabupatén Klungkung, Propinsi Bali |
| Koleksi | Lukisan |
| Pendiri | I Nyoman Gunarsa |
| Pemilik | I Nyoman Gunarsa |
I Nyoman Gunarsa pinaka sané nuwenang museum puniki embas ring Désa Banda, Klungkung duk warsa 1944 tur seda. Dané kauningin antuk Maestro sané madué "tangan emas". Dané mlajah seni tur lulus ring Akademi Seni Rupa Indonésia (ASRI) sané magenah ring Yogyakarta.[4] Dané seda daweg mayusa 73 tiban ring warsa 2017 saantukan keni sakit jantung.[5]
Pustaka
uah- ↑ "Sejumlah Koleksi Museum Gunarsa Jadi Benda Cagar Budaya | Kabar24". Bisnis.com. 2018-02-14. Kaaksés 2021-07-09.
- ↑ "Museum Seni Lukis Klasik Bali "Nyoman Gunarsa"". asosiasimuseumIndonésia.org. Kaaksés 2021-07-09.
- ↑ "Museum Nyoman Gunarsa Klungkung Bali" (ring Indonesia). Kaaksés 2021-07-09.
- ↑ "Galeri Nasional Indonésia - Website resmi Galeri Nasional Indonésia (GALNAS)". galeri-nasional.or.id. Kaarsipin saking versi asli tanggal 2021-07-09. Kaaksés 2021-07-09.
- ↑ "Maestro seni lukis asal Bali I Nyoman Gunarsa meninggal dunia | Pascasarjana ISI Yogyakarta" (ring Indonesia). Kaarsipin saking versi asli tanggal 2021-07-09. Kaaksés 2021-07-09.