Gaguritan Aji Sesana

Gaguritan Aji Sesana silih tunggil gaguritan sané madaging pitutur indik sesana embas dados manusa. Dados manusa patutné éling majeng raga tatujon émbas ring marcapada dados manusa, sawitra miwah musuh wénten ring raga iraga. Ring gaguritan puniki madaging tutur tiga dasar dados manusa punika Tri Kaya Parisudha. Taler asapunapi sapatutné ngamargiang kauripan patut tan pamrih miwah narima phala saking kauripan sadurungné. Sekadi kaconto ring carita gaguritan puniki Korawa miwah Pandawa ring dija korawa kanikayang dados jadma-jadma sugih (I Sugih) miwah Pandawa (I Tiwas) dados jadma-jadma tiwas. Ring sedek dina anu ring carita geguritan puniki Sang Dharmawangsa ngicain pitutur majeng Bima sané jagi ngarabeda krana mrasa Pandawa kéwerin olih Duryodana, santukan punika kanikayang pitutur olih Dharmawangsa inggih punika dané patut narima makasami napi sané patutné katerima dados pahan saking hasil parilaksana sadurungné. Ring gaguritan puniki taler kanikayang indik sastra, sastra prasida dados sundih miwah ngardi jadma sané malajahin paling. Jadma sané malajah sastra kanikayang jadma buta ri kala dané nénten uning jangkep pacang paling miwah ngarasa pinih uning. Ring gaguritan puniki kanikayang 7 orang buta sané jagi nguningin gajah. Wénten sané megang kuping, belalai, awak, batis miwah sané liyanan, salantur nyané katakenin dané nyawis rupa gajah sekadi napi sané dané pegang, punika kaanggep jadma sané tan uning marasa déwék uning.

Geguritan Aji Sesana
Wikipustaka
Aran liyanan	gaguritan·hajiśaśaṇa
Pinanggal asal	1909
Kawedar kapertama ring	Ababi, Abang, Karangasem
Basa(-basa)	Basa Kawi
Juru tulis	I Wayan Sepel miwah I Ketut Sengot
Ukuran	35 cm x 3,5 cm
Format	Gaguritan
Aksara	Aksara Bali
Lempir	27
Ngranjing Koleksi ring	Kapustakaan Kantor Dokuméntasi Budaya Bali
Klasifikasi Gedong Kirtya	Itihasa

Naskah puniki puput katedun ulang saking padruén sadurungné ring rahina soma paing, wuku sinta, sasih kapat, Isaka 1909, ring warsa maséhi tanggal 28 Séptémber 1987 olih I Ketut Sengot, warga pasek saking Désa Pidpid Kalér Kauh Marga, Désa Pidpid, Kecamatan Abang, Kabupatén Karangasem. Induk lontar puniki druén I Wayan Sepel saking Désa Umanyar, Ababi, Kecamatan Abang, Kabupatén Karangasem