Bawang

Bawang inggih punika entikan sané katah kaanggén makarya basa utawi kaanggén dados sarana matetamban. Yening selehin saking kawéntenannyane, bawang puniki mawit saking Iran, Pakistan miwah Syria, raris ngranjing ke India duk warsa 600 sadurung Masehi (600 SM). Saking India puniki raris ngranjing ke Amérika, Asia Timur, ngantos ka Asia Tenggara

Bawang Bombay

Ceciren Morfologi

Bawang puniki maduwe makudang-kudang ceciren morfologi, inggih punika:

1. Akah: Akah Bawang puniki magenah ring betén umbinnyane. Lantang akah Bawang puniki prasida ngantos 15–30 cm.
2. Katik: Katik Bawang puniki katah kabaos katik sujati (batang sejati) utawi katah kabaos Diskus. Katik puniki marupa cakra inggih punika bunter miwah tipis. Katik pah duur saking bawang puniki marupa umbi semu utawi Bulbus sané mawit saking bongkol donnyane. Raris umbi semu sané wénten ring tanah dados umbi lapis.
3. Don: Don Bawang puniki mawarna gadang, raris risampune tuh mawarna coklat. Don Bawang punika giling sekadi pipa, raris panjangnnyane pantaraning 45–70 cm taler muncuknyane lanying.
4. Bunga: Bungannyané ngarumpyuk mawentuk bongkol, macarang silindris tegehnyané kirang-langkung 40 cm, mawarna gadang saha madué nenem benang sari, tur ring tengahnyané madué garis mawarna putih. Wohnyané bunter tur mawarna gadang, madué akah serabut.

Kawigunan

Bawang madué kawigunan anggén basa taler kanggén ngilangin gelem panes. Yéning jagi kanggén ubad gelem panes, ambil kirang-langkung duang dasa gram (20 gr) umbi Allium cepa, wasuh tur kihkih. Ri sampunné makihkih, kihkihané punika kacampuhin aséndok lengis nyuh, saha usapin ring angga. Umbi lapis Allium cepa madué kandungan saponin, flavonoida, polifenol, miwah minyak atsiri.

Wewidangan tumbuhnyané bawang punika ring Indonésia inggih punika ring 24 saking 34 propinsi. Propinsi sané paling akéh ngasilang entikan bawang punika minakadi Sumatra Utara, Sumatra Barat, Jawa Barat, Jawa Tengah, DIY, Jawa Timur, Bali, NTB, miwah Sulawesi Selatan.