Wewangsalan

Wewangsalan puniki pateh sakadi (Basa Indonésia: tamsil). Wewangsalan kruna lingganipun "wangsal" sané suksemanipun "lampah", polih pangiring "an" dados "wangsalan", kaduipurwayang dados "wewangsalan", artinipun lelampahan saparipolah kalih kahanan janma, sakadi sasimbing sané sada pedas suksemanipun.

Wewangsalan puniki kawangun antuk lengkara kalih palet utawi carik. Lengkara sané riinan sakadi "sampiran", indik daging kahiun sang ngucap, kewanten kantun makubda (ilid) suksemanipun. Lengkarane sané pungkuran punika daging sajati, sané nerangan suksemanipun tur mawirama kalih mapurwakanti (bersajak). Wenten taler sané nenten ngucapang lengkarane pungkuran, antuk kasengguh sami anake sampun ngerti ring suksemanipun. Ring asapunapine kawangun antuk lelampahan ring pawayangan. Ki Dalang ngawi satua bawak babaudan, nyimbingin silih tunggil sang nonton sané saud (iwang) laksananipun. Wenten taler sané mawangun gambar (karikatur).

Conto

Ring sor puniki wénten makudang-kudang wewangsalan luiripun:

1. Asep menyan majagau, suksemanipun: nakep lengar aji kau
2. Ada tengeh masui kaput, suksemanipun: ada keneh mamunyi takut
3. Bakat kocok misi isen, suksemanipun: awak bocok tuara ngasén
4. Bambang dadua kén ceburin, suksemanipun: bajang dadua kén anggurin
5. Bawang payane satuh aketungan, suksemanipun: tawang dayane patuh paitungan.
6. Bébé padang gambuh, suksemanipun: magae ngandang nganjuh
7. Bé bébék bé guling, suksemanipun: busan kedék jani ngeling
8. Bé lélé mawadah kau, suksemanipun: suba jelé mara tau
9. Bedeg majemuh bangsing di banjar, suksemanipun: jegég buin lemuh langsing lanjar
10. Baju gadang potongan gantut, suksemanipun: tuyuh magadang tuara maan entut
11. Buangit kali gangsa, suksemanipun: magaé lengit ngamah gasa (kereng)
12. Buah sabo mawadah klukuh, suksemanipun: awak bodo buin angkuh
13. Cekcek poleng temisi bengil, suksemanipun: desek ngereng gisi nengil
14. Clebingkah betén biu, suksemanipun: gumi linggah ajak liu
15. Dagdag candung selem samah, suksemanipun: berag landung kereng ngamah
16. Delem sangut merdah tualen, suksemanipun: medem bangun ngamah dogén
17. Dija kacang ditu komak, suksemanipun: dija pejang ditu jemak
18. Don sente don pelendo, suksemanipun: ade kene ade keto
19. Eber-eber ilih, suksemanipun: bebegér baan nyilih
20. Gamongan kladi jae, suksemanipun: omongan dadi gaé
21. Gedénan padange tekén gondané, suksemanipun: gedénan tandangé tekén gobané
22. Goak memaling taluh, suksemanipun: satua bawak tuah amonto
23. Gonda godeg bakat kukur, suksemanipun: goba jegég baan pupur
24. Idup kedele mati kacang, suksemanipun: idup jelé mati sayang
25. Jempiit batan biu, suksemanipun: ngajengit ajaka liu
26. Sengauk agrobag, suksemanipun: mauk buin bobab