Usaba sumbu
Usaba Sumbu inggih punika upakara sané kalaksanayang nyabran warsa ring désa Timbrah, Kabupatén Karangasem. Upakara yadnyané puniki kapiletin olih warga désa Timbrah pinaka bhakti ipun kapining Ida Sang Parama Kawi. upakara puniki ketah kauningin pinaka upakara sané nganggén tiang sané malakar antuk tiying sané jegjeg tur madaging sarwa upakara, sané kabaos sumbu (Sumbu maartos poros utawi pusat). Tegeh tiangé puniki kirang langkung selaé méter saking sor. Sumbu puniki kawangun antuk sarwa upakara minakadi rerenteng, bungan langkuas, reringgitan naga sari, wayang miwah sané lianan. Ring muncuk sumbu puniki madaging manuk déwata sané kapercaya jagi nekedang upakarané puniki kapining Ida Sang Hyang Widhi Wasa.
Rikala nyujukang sumbu, sadurungné kawéntenang upakara nyulubin sumbu olih bajang-bajang ring désa inucap. Sumbu punika kajujukang ring tongos sané dangsah. Bajang-bajang sané polih ayahan sumbu nganggén busana rejang, raris ngeranjing ring sor sumbuné punika. Risampuné ngeranjing, sumbu puniki kalingserang olih truna-truna adat. upakara puniki ketah kabaos sakadi pamuteran Gunung Mandara Giri. Sumbu puniki pinaka simbol Bhuana Agung.
Risajeroning upakara usaba sumbu, désa adat sané kakepah dados papat pauman, minakadi pauman Béji, Pauman Pesa, Pauman Manak Yéh, tur Pauman Lambuan nunjuk bajang sané jagi sareng ayahan sumbu. Soang-soang pauman punika nunjuk asiki bajang, sajabaning pauman désa sané nunjuk bajang kakalih, sawiréh pauman puniki madué krama désa pinih akéh.
upakara Usaba Sumbu puniki ketah kalaksanayang aminggu, kakawitin antuk upakara melasti ka segara. Tigang rahina selanturnyané kalaksanayang acara Usaba Sumbu Kaja. Rikala punika para krama banjar ngaturang bhakti ring galah roras wenginé. Selanturnyané kalaksanayang upakara pangajengan. Ring rahinané puniki kalaksanayang tabuh rah anggén nyomia butha kala. Risampuné puput, kalanturang antuk upakara panyelagan. Ring rahina puniki para krama désa nyayagayang sakancan upakara sané kaanggén ri kala Usaba Sumbu Kelod. Risampuné upakara-upakara punika sampun sayaga, benjang nyané kalaksanayang upakara Usaba Sumbu Kelod. upakara puniki katujuang majeng ring Ida Batara Sri Rambut Sedana, antuk ngadegang kakalih sumbu punika taler kaaturang bawi guling.