Umah Tongkonan

Umah Tongkonan inggih punika umah adat krama suku Toraja sane magenah ring Provinsi Sulawesi Selatan, Indonesia. Tongkonan ring basa Toraja maartos pinaka genah malinggih (tongkon = duduk). Tongkonan inggih punika umah panggung krama Toraja sane mawentuk persegi panjang. Kakaryanin pinaka umah panggung mangda sane nuenin umah nenten kausik olih buron tawah.

Tongkonan inggih punika umah adat krama Toraja sane pinaka genah meneng, kekuasaan adat, miwah panglimbak kahuripan sosial budaya krama Toraja. Tongkonan nenten prasida kadruenin antuk praragan, sakewanten kadruenin turun temurun olih kulawarga utawi marga suku Tana Toraja.

Pahan Umah

Umah Tongkonan kapah dados tigang genah minakadi ring sor puniki.

Genah ring ajeng utawi Tangdo taler kabaos tale benua sane majeng kaler pinaka genah nyuguhang kurban ring upacara pemujaan Puang Matua. Sane magenah ring tengahing umah kabaos sali, genahnyane lebih jimbar miwah lebih endep saking genah sane tiosan. Genah puniki kapah dados sisi kauh miwah sisi kangin. Ring sisi kauh pinaka genah nyuguhang kurban ring upacara Aluk Rambu Solo miwah ring sisi kangin pinaka genah nyuguhang kurban ring upacara Aluk Rambu Tuka. Genah ring ungkur kabaos sumbur utawi pollo banua.

Soroh

Umah adat Tongkonan madue makudang-kudang soroh umah sane matiosan, minakadi ring sor puniki.

1. Tongkonan Layuk inggih punika soroh umah adat Tongkonan sane pinih kapertama manados pusat pamerintahan miwah kekuasaan. Umah puniki kanggen pinaka genah sane ngatur makasami urusan pamerintahan mangda prasida mamargi antar.
2. Tongkonan Pakamberan inggih punika soroh Umah Tongkonan sane kanggen olih penguasa risajeroning pamerintahan adat. Amongan saking kulawarga punika minakadi nglanturang tradisi lokal sane wenten miwah ngwarisang tradisi punika ring generasi salanturnyane.
3. Tongkonan Batu A'riri inggih punika soroh Umah Tongkonan sane kanggen genah meneng olih kulawarga biasa. Tongkonan Batu puniki madue ukuran sane nenten sanget ageng miwah mabinayan akidik saking Umah Tongkonan sane tiosan.