Umah Musalaki

Umah Musalaki inggih punika umah adat sane wenten ring Provinsi Nusa Tenggara Timur. Umah puniki manados lambang saking Provinsi Nusa Tenggara Timur. Umah adat puniki manados genah meneng pamekasnyane kepala suku saking makudang-kudag suku ring Provinsi Nusa Tenggara Timur. Duaning sampun manados lambang saking provinsi, mangkin desain wangunan pamerintahan minakadi kelurahan, kecamatan, kantos kabupaten ring Nusa Tenggara Timur akehan nganggen konsep Umah Musalaki.

Kawigunan Umah

Manut ring wastannyane, kawigunan sane utama saking Umah Musalaki inggih punika pinaka genah meneng ketua adat utawi kepala suku, pamekasnyane Suku Ende Lio. Tiosan punika, umah adat puniki sering kanggen pinaka genah ngamargiang upacara adat, paparuman adat, miwah parikrama adat sane tiosan.

Pahan Umah

Umah Musalaki kapah dados tiga sakakdi puniki. Kuwu Lewa inggih punika pondasi umah adat sane kakaryanin antuk batu lonjong sane kapasang vertikal. Yadiastun wenten pondasi saking batu marupa kuwa lewa puniki, sakewanten umah adat Musalaki tetep kadagingin pondasi kayu sane mawiguna pinaka penyokong raab umah. Maga inggih punika bataran gantung sane kakaryanin antuk rangkepan papan-papan panang. Umah adat Musalaki puniki mawentuk umah panggung sane tegeh batarannyane kirang langkung 60-100 meter saking tanah. Wenten kalih soroh bataran umah adat Musalaki manut tegehnyane. Wenten bataran teras utawi tenda teo miwah bataran koja ndawa. Bataran tenda teo puniki sane magenah ring sisi sane kawentenannyane lebih tegeh saking bataran koja ndawa sane magenah ring tengahing umah. Atap utawi raab inggih punika silih tunggil pahan umah adat Musalaki sane unik. Raab umah puniki kakaryanin antuk somi sane matumpu ring rangka raab sane wit saking saka ubu, kayu palang, jara, miwah leka reja. Raab puniki kabaos unik duaning wentuknyane sane menjulang ngamenekang.