Umah Krong Bade

Umah Krong Badé inggih punika silih tunggil umah adat sané wénten ring Indonesia pamekasnyané magenah ring Nangroe Aceh Darussalam. Umah Krong Badé punika kawangun antuk bahan baku alam. Tiosan pinaka genah meneng, ukiran sané wénten ring tengahing Umah Krong Badé manados cihna status ékonomi sang sané nuénin.^[1]

Cacirén Umah Krong Badé

Ring ajeng umah puniki madaging undagan sané kanggén ngranjing ka tengah umah. Umah punika tegehnyané sekitar 2,5 méter kantos 3 méter saking duur tanah. Undagan puniki akéhnyané ganjil sekitar 7-9 undagan. Umah Krong Puniki kawangun nénten nganggén paku kagentosin antuk tali sané ngiket bahan wangunané punika. Tembok umah puniki saking kayu enau sané kaias antuk lukisan miwah raabnyané saking don rumbia. Ukiran sané wénten ring tengah umah puniki matiosan, sayan akéh ukirannyané pinaka cihna sayan sejahtera tingkat ékonomi sang sané nuénin. ^[2]

Paletan Ngwangun

Wénten makudang-kudang paletan ngwangun Umah Krong Puniki sakadi ring sor puniki.

Paletan kapertama inggih punika ngamargiang paparuman sareng kulawarga. Yéning sakulawarga sampun igum, raris matur ring Teungku utawi Ulama nganinin indik pangrencana ngwangun Umah Krong Badé. Wusan punika, salanturnyané nyayagayang bahan ngwangun umah. Bahan-bahan sané kaperluang risajeroning ngwangun minakadi kayu, tiing, don rumbia, miwah ambengan sané kanggén ngiket. Kayu sané kanggén punika kayu sané nénten kakilit antuk akah. Yéning bahan-bahan sampun jangkep, raris bahan punika kaolah. Makasami kayuné punika kagenahang ring genah sane tis saha nénten keni sabeh. Kayuné punika karendem mangda berek, taler salanturnyané kayu punika kapinda manut kebutuhan umah. Suwusan punika raris ngadegang umah antuk makarya landasan pinaka genah ngadegang kayu kapertama. Kayu sané kapertama puniki manados tiang raja sané salanturnyané kairing antuk tiing sané tiosan. Yéning tiang punika sampun sami kapasang wawu makarya témbok miwah bataran umah. Sané kaping untat inggih punika masang ornamen pinaka iasan ring umahé punika minakadi ukiran utawi lukisan.

Pustaka

↑ Tim Editorial Rumah.com (2020-06-17). "Mengenal Rumah Adat Krong Badé Aceh Lengkap". Rumah.com. Kaaksés 2023-02-08.
↑ Media, Kompas Cyber (2022-02-07). "Rumah Adat Krong Badé Berasal dari Aceh: Ciri-ciri, Fungsi, Keunikan, dan Arsitektur Halaman all". KOMPAS.com (ring Indonesia). Kaaksés 2023-02-08.

[1] Tim Editorial Rumah.com (2020-06-17). "Mengenal Rumah Adat Krong Badé Aceh Lengkap". Rumah.com. Kaaksés 2023-02-08.

[2] Media, Kompas Cyber (2022-02-07). "Rumah Adat Krong Badé Berasal dari Aceh: Ciri-ciri, Fungsi, Keunikan, dan Arsitektur Halaman all". KOMPAS.com (ring Indonesia). Kaaksés 2023-02-08.

[1]

[2]