Umah Gadang

Umah Gadang inggih punika umah adat krama Minangkabau, Sumatera Barat. Umah Gadang kawangun pinaka genah meneng sapisanan genah ngamargiang acara adat.

Lelintihan Umah Gadang

Umah Gadang ketah kabaos mapaiketan ring carita kamenangan krama Minangkabau nglawan Majapahit. Kocap, dumun Kerajaan Majapahit meled makuasa ring wawidangan Minangkabau. Risajeroning nglawan krama Minangkabau, majapahit nyayagayang akeh pisan pasukan. Sakewanten duaning krama Minangkabau uning jagi kalah, krama Minangkabau milih mangda perang punika kagentosin antuk adu kebo. Yening kebo Majapahit sane menang, Majapahit dados nguasayang Minangkabau. Sakewanten yening Majapahit sane kalah, Majapahit patut lunga saking Minangkabau. Majapahit nyumpunin indike punika, taler ngirim kebo muani sane gede. Sakewanten, krama Minangkabau saking dumun sampun kauningin kawikanannyane. Krama Minangkabau nenten ngirim kebo sane pateh gedene, sakewanten ngirim bedigal utawi panak kebo. Rikala kalebang, bedigal punika raris malaib ka basang kebo Majapahit ngrereh susu. Basang kebo Majapahit uek sangkaning bedigale punika madaging tiuk. Pamuputnyane, kebo Majapahit mati tur krama Minangkabau sane menang. Duaning punika, Umah Gadang kawangun mirip kadi tanduk kebo pinaka lambang kamenangan krama Minangkabau.

Caciren Umah Gadang

Silih tunggil ciri Umah Gadang sane paling khas inggih punika pinda raab sane gede miwah lanying ring kedua sisi. Duaning pinda raabnyane, Umah Gadang ketah kabaos umah gonjong, bagonjong. Tiosan ring punika, Umah Gadang karancang tahan linuh. Puniki duaning wawidangan Sumatera Barat sering wenten linuh. Tiang-tiang Umah Gadang nenten katanem ring tanah, sakewanten kagenahang ring duur batu sane kuat.

Soroh-soroh Umah Gadang

Manut sorohnyane Umah Gadang kapah dados kalih, inggih punika Umah Gadang pola koto piliang miwah pola budi caniago. Umah Gadang soroh koto piliang madue tiga gonjong ring kiwa miwah tengen, siki gonjong ring ajeng, miwah siki gonjong ring ungkursoroh puniki madue anjungan. Soroh sane kaping kalih inggih punika budi caniago sane madue kalih gonjong ring sisi kiwa miwah tengen. Umah dados madue siki gonjong ring ajeng miwah gonjong ungkur, sakewanten nenten madue anjungan. Anjungan inggih punika genah para pemimpin.

Kawigunan Umah Gadang

Umah Gadang kawangun olih krama asli sane madue peran. Umah punika kanggen pinaka genah ngajeng, sirep, ngrateng, miwah mapupul.

Tiosan punika, ring sarahina Umah Gadang madue kawigunan adat minakadi ring sor puniki.

1. Pinaka genah ngamargiang upacara sane mapaiketan ring kahuripan minakadi turun mandi, khitan, kamatian miwah pawiwahan.
2. Pinaka genah ngamargiang upacara adat minakadi pengangkatan datuak risajeroning Batagak Gala.
3. Pinaka genah paparuman krama ring sawawidangan.