Umah Dulohupa

Umah Dulohupa inggih punika silih tunggil umah adat Gorontalo. Dulohupa mateges musyawarah ring basa Gorontalo. Dulohupa inggih punika balai musyawarah saking pasametonan kerajaan. Wangun umah adat puniki marupa panggung sané mapiranti saking papan saha wangun raabné khas Gorontalo. Ring pahan ungkur umah dulohupa wénten genah masandekan anggén para raja saha pasametonan kerajaan sinambi nyingakin para yowanané maplalian. Ring masa kerajaan dumun, umah dulohupa kanggén pinaka genah pengadilan kerajaan. Umah adat dulohupa pinaka genah wisata budaya sané wénten ring jantung kota Gorontalo. Pinaka genah wisata, pamerintah kota Gorontalo madué galah mangda sida nyinahang umah adat miwah budaya Gorontalo majeng sang sané ngrauhin genah punika.

Wangun miwah Kawigunan Umah Dulohupa

Manut saking buku Arsitektur Benteng dan Rumah Adat ring Sulawesi, umah adat dulohupa kawangun nginutin desa kala patra sané wénten irika.

1. Manut piranti kayu sané kaanggén, punika ngambil filosofi wangun déwék manusa saha dasar kaprecayan, minakadi madaging pilar panyokong sané kaumpamayang sakadi batis i manusa.
2. Raab dulohupa mapiranti antuk somi sané sakadi pelana, inggih punika maraab segitiga masusun kalih nyinahang artos pamargin tri hita karana inggih punika paiketan manusa sareng Sang Hyang Parama Kawi, manusa sareng manusa, miwah manusa sareng palemahan.
3. Ring langgatan umah wénten kalih kayu sané kapasang masilang, ketah kawastanin talapua sané mawiguna mangda sida nyomia saluir bhuta kala saha ngedohin saluir baya.
4. Panggung umah dulohupa kasokong antuk kalih pilar utama sané kawastanin wolihi, nenem akehné pilar ring ajeng, saha pilar dasar akéhné tigang dasa kalih (32) katik kawastanin potu.
5. Akéh ruangan ring umah dulohupa wantah ptung ruangan kémanten, duaning wantah kanggén parum utawi panglaksanan parikrama sané mapaiketan ring adat, seni, miwah budaya ring Gorontalo.
6. Umah dulohupa kajangkepin antuk kalih tangga, inggih punika tangga sané magenah ring sisi kiwa miwah tengen umah sané manados simbol tangga adat, kawastanin tolitihu.
7. Mangkin, umah adat dulohupa kawigunayang anggén pamargin upacara adat, sakadipawiwahan miwah panglaksanan seni budayaring Gorontalo.
8. Sajeroning wewidangan umah dulohupa taler wénten piranti sané anggéna rikala pawiwahan, minakadi: busana pawiwahan, payasan, saha piranti-piranti sané mapangarga tiosan.