Tari Seudati

Tari Seudati inggih punika silih tunggil tarian tradisional sané mawit saking Acéh. Tari puniki ketahnyané kasolahang olih sekelompok pragina lanang sané gerakannyané khas tur enerjik. Tarian puniki kairingin olih syair miwah suara saking para pragina. Tari Seudati puniki dados silih tunggil tarian sané kasub ring wawengkon Acéh. Tari puniki taler ketah kasolahang ri tatkala wénten acar adat, acara pabalihan, miwah acara budaya.

Tari Seudati

Lelintihan

Manut saking lelintihannyané, tari puniki wénten tur nglimbak ring Désa Gigieh, Kecamatan Simpang Tiga, Kabupatén Pidie, Aceh, sané kapimpin olih Syem Tam. Tarian puniki salanturnyané nglimbak ka wawengkon lianan, sakadi ring Désa Didoh, Kecamatan Mutiara, Kabupatén Pidie, sané kapimpin olih Syeh Ali Didoh. Tari puniki taler sampun nglimbak ring sajebag wawengkon Acéh sané linanan. Ring galah sadurungnyané, tarian puniki kaanggén antuk nglimbakang agama Islam. Nanging ri tatkala kajajah olih Belanda, tarian puniki nenten dados kasolahang krana prasida ngamedalang semangat para krama Acéh, tur prasida ngranayang pemberontakan majeng Belanda. Sasampun kamahardikayan Indon;esia, tarian puniki dados malih kasolahang, tur tarian puniki taler kaanggén babalihan.

Kawigunan

Tari Seudati sadurungnyané kaanggén dados média dakwah. Nanging ring galahé puniki, tarian puniki taler kaanggén dados tari pertunjukan utawi babalihan. Wastan tari Seudati mawit saking kruna “Syahadat” sané maartos "masaksi". Ring agama Islam artosnyané pangakuan majeng ring Tuhan miwah Nabi. “Syahadat” punika kabuktiang ring kawéntenan syair-syair sané kagendingang olih pragina antuk ngiringang tarian punika. Syair punika ketahnyané madaging indik kauripan miwah ajahan agama. Gerakan ring tarian punika taler madué nilai miwah makna sané khusus.

Sasolahan

Tari Seudati ketahnyané kasolahang olih para pragina lanang. Pragina punika ketahnyané wénten kutus diri, inggih punika siki pragina dados syeh, siki pragina dados pembantu syeh, kalih pragina apeet wie, siki pragina dados apeet bak tur tigang pragina dados pembantu biasa. Lianan saking punika wénten kalih pragina sané tugasnyané magending syair aneuk syahi. Gerakan ring tarian Seudati punika khas, enerjik, miwah lugas. Ring gerakannyané akéh wénten gerakan tangan miwah cokor. Wénten taler gerakan nepuk tangkah, ketipan jeriji, gerak tangan, miwah gerakan cokor sané lincah. Nika mawinana sang sané mabalih seneng nyingakin tarian puniki.

Pangiring

Ring pertunjukan tari Seudati puniki ketahnyané nénten kairingin olih alat musik, nanging kairingin olih gending syair manten. Syair sané kagendingang ketahnyané indik kauripan miwah ajahan agama. Lianan saking punika, tarian puniki taler kairingin olih suarat tepukan, hentakan cokor, miwah petikan jeriji saking para pragina. Gerakan punika manut saking irama miwah tempo lagu utawi syair sané kagendingang.

Panganggé

Panganggé sané kaanggén olih para pragina ring tari Seudati puniki ketahnyané nganggén panganggé khusus sané manut ring adat. Pangganggé punika ketahnyané wénten baju ketat sané malengen panjang tur celana panjang. Baju miwah celana punika mawarna putih. Wénten taler aksésoris sakadi kain songkét sané kaanggén ring bangkiang ngantos paha, wénten rencong sané kagenahang ring bangkiang, taler wénten tangkulok utawi ikat prabu sané mawarna barak.

Kadaftarang ka UNESCO

Pamerintah Acéh naftarang Tarian Seudati puniki ka UNESCO, dados warisan seni budaya nénten benda. Nika matetujon mangda tarian punika tetep ajeg tur lestari