Tari Remo

Tari Remo inggih punika silih tunggil sasolahan sané mawit saking Jombang, propinsi Jawa Timur, Indonésia. Sasolahan puniki kaanggén antuk nyanggra tamiu. Kruna remo mawit saking kruna Reyoge Cak Mo. Sasolahan puniki madué téma kepahlawanan.^[1]

Lelintihan

Tari Remo kakaryanin olih seniman kasub saking Jombang sané mawasta Cak Mo. Cak Mo naenin dados Gemblak ring silih tunggil pupulan Reog ring Ponogoro, nanging krana musim sané nénten becik, Cak Mo ngrereh pangupa diri sané lianan. Cak Mo sané seneng masesolahan, ngrereh pangupa diri antuk masesolahan ngelilingin désannyané nganggén penganggé Jathilan tur kairingin olih musik kenong sané kasuarayang olih rabinnyané. Cak Mo ngambil gerak saking Jathilan, Warok, Tayub, tur sinambi makidung tembang, peparikan ngantos kasenengin oleh kramané, nika mawinan para kramané uning sareng tari Reyoge Cak Mo sané kasingkat dados Remo.

Manut sané sampun lintang, tari punika khusus kasolahang olih para pragina lanang, krana mapaiketan sareng lakon sané kasolahang ring tari punika. Pagelaran tari Remo ketahnyané nyaritayang indik pangéran sané sedek perang ring médan perang, nika mawinan sang pragina patut gagah ri tatkala nyolahang tari puniki. Manut saking panglimbakan tari Remo, sadurungnyané tari puniki kaanggén antuk ngawitin pagelaran ludruk. Nanging salanturnyané pawigunan tari puniki nglimbak saking ngawitin pagelaran ludruk, dados tari antuk nyanggra tamiu, khususnyané tamiu kanegaraan. Lianan saking punika, taro Remo taler kasolahang ring festival daerah antuk utsaha ngalestariang budaya Jawa Timur. Nika mawinan, ngantos galah puniki, tari Remo nénten malih kasolahang olih anak lanang manten, nanging kasolahang taler olih anak istri. Wénten sané mawasta tari Remo putri. Ring tari Remo putri, ketahnyané para pragina nganggé penganggon tari sané malianan sareng penganggon tari Remo asli sané kasolahang olih pragina lanang.^[2]

Gerak

Cecirén utama ring tari Remo nggih punika gerak cokornyané sané dinamis. Gerakan punika kadukung oleh kawéntenan loncéng sané kapasang ring pagelangan cokor para praginannyané. Loncéng punika pacang masuara ri tatkala para pragina matindakan ring panggung, Lianan saking punika, cecirén sané lianan inggih punika seléndang, gerak sirah, ékspresi mua, miwah kuda-kuda para pragina sané ngawinang tari puniki ngancan ngulangunin.

Penganggé

Penganggé para pragina tari Remo wénten makudang-kudang soroh, sakadi Gaya Sawunggaling, Surabayan, Malangan, miwah Jombangan. Nanging makasami soroh masaih krana nganggén penganggé dasar Jathilan Reog Ponorogo tur nènten nganggèn ulatan kuda kepang. Lianan saking punika, wénten taler penganggé tari Remo sané khusus kaanggén olih para pragina istri.^[3]

Penganggé Gaya Surabayan kapah saking tali ring sirah, baju sané nénten madué kancing, celana sané nganggé jaum mas, sarung batik Pesisiran, setagén sané kalilitang ring bangkiang, tur keris sané kagenahang ring durinnyané. Para pragina nganggé kalih seléndang, siki kagenahang ring bangkiang, tur malih siki kagenahang ring bahu, tur soang-soang pragina makta ujung seléndang. Lianan saking punika, wénten taler gelang kaki marupa pupulan loncéng sané kagenahang ring pagelangan cokor.
Penganggé Gaya Sawunggaling masaih sareng gaya Surabayan, nanging ring soroh puniki khusus nganggén kaos mawarna putih sané malengen lantang sané ngentosin kwaca selem kerajaan
Penganggé Gaya Malangan masaih sareng gaya Surabayan, nanging ring soroh puniki nganggén celana panjang tur nénten nganggén jaum
Penganggé Gaya Jombangan masaih sareng soroh Sawunggaling, nanging para pragina nénten nganggén kaus, para pragina nganggén rompi
Penganggé Remo Putri malinanan sareng soroh remo sané asli. Para pragina nganggén sanggul, nganggén mekak selem antuk nutupin tangkah, nganggén rapak antuk nutupin bangkiang ngantos entud, tur nganggén siki seléndang manten sané kagenahang ring bahu.

Iringan

Musik sané ngiringang tarian puniki, inggih punika gamelan, sané kapah dados bonang barung/babok, bonang penerus, saron, gambang, gender, slentem siter, suling, kethuk, kenong, kempul, miwah gong. Irama sané ketah ngiringang tari Remo, inggih punika Jula-Juli miwah Tropongan. Nanging, wénten taler marupa gending Walangkekek, Gedok Rancak, Krucilan miwah gending-gending kréasi sané baru. Ring pagelaran ludruk, ketahnyané para praginané magending ring tengahing sasolahan.

Pustaka

↑ "Tari Remo - Sejarah, Makna, Komposisi Gerakan, serta Perkembangan Saat Ini". RimbaKita.com (ring Indonesia). 2022-06-03. Kaaksés 2022-07-10.
↑ Admin (2021-12-18). "Tari Remo, Mengupas Sejarah dan Keunikan di Baliknya". Gasbanter Journal (ring Indonesia). Kaarsipin saking versi asli tanggal 2022-07-10. Kaaksés 2022-07-10.
↑ "Serba-serbi Tari Remo, Tarian dari Jawa Timur yang Sarat Makna - Lifestyle Katadata.co.id". katadata.co.id (ring Indonesia). 2021-11-22. Kaaksés 2022-07-10.

[1] "Tari Remo - Sejarah, Makna, Komposisi Gerakan, serta Perkembangan Saat Ini". RimbaKita.com (ring Indonesia). 2022-06-03. Kaaksés 2022-07-10.

[2] Admin (2021-12-18). "Tari Remo, Mengupas Sejarah dan Keunikan di Baliknya". Gasbanter Journal (ring Indonesia). Kaarsipin saking versi asli tanggal 2022-07-10. Kaaksés 2022-07-10.

[3] "Serba-serbi Tari Remo, Tarian dari Jawa Timur yang Sarat Makna - Lifestyle Katadata.co.id". katadata.co.id (ring Indonesia). 2021-11-22. Kaaksés 2022-07-10.

[1]

[2]

[3]