Tari Ranup Lampuan

Tari Ranup Lampuan inggih punika silih tunggil sasolahan tradisional sané wit saking wawidangan Acéh. Ssolahan puniki rumasuk sasolahan panyambrama sané ketah kasolahang olih para istri antuk misuguhang basé pinaka tanda terima masyarakat. Tari Ranup Lampuan pinaka silih tunggil sasolahan tradisional sané kaloktah ring Acéh, miwah ketah kasolahang rikala nyambrama tamiu terhormat utawi acara panyambrama adat tiosan.

Lelintihan

Tari Ranup Lampuan kapertama karipta duk warsa 1959 olih silih tunggil seniman sane kaloktah saking Acéh mapeséngan Yusrizal. Wastan Tari Ranup Lampuan puniki kambil saking kruna "Ranup" miwah "Lampuan". Kruna Ranup ring basa Acéh maartos 'basé', miwah puan inggih punika genah utawi wadah basé khas Acéh. Kocap, sasolahan puniki kaangkat saking kebiasaan adat krama Acéh rikala nyanggra tamiu terhomat antuk misuguhang basé pinaka tanda terima.

Manut sumber sejarah sané wéntén, Tari Ranup Lampuan sampun ngamolihang makudang-kudang pauahan kantos mangkin. Sasolahan puniki pangawitnyané kasolahang olih makudang-kudang pragina istri sané kairing antuk musik orkéstra utawi band. Ring warsa 1959 Tari Ranup Lampuan kamodifikasi antuk ngwewehin 3 pragina lanang, sané kalih pinaka pengawal nganggén pedang miwah asiki makta vandel.

Sakéwanten ring warsa 1966 sasolahan puniki kauah malih ka wentuk sane dumun. Puniki mangda manut ring paweweh saking para panglingsir adat, inggih punika wantah pragina istri sané masolah. Tiosan punika taler wénten pauahan durasi duaning karasayang dahat panjang, dadosnyané sasolahan puniki ngamolihang pemadatan.

Pengembangan Tari Ranup Lampuan puniki durung puput, ring warsa 1972 sasolahan puniki ngamolihang pauahan malih ring musik pangiringnyané. Dumun sasolahan puniki nganggén musik orkéstra utawi band, sakéwanten sampun kagentosin antuk alat musik trasidisional minakadi serune kale, gendrang, miwah rampa'i mangda madué kesan tradisional. Sasampuné ngamolihang akéh pauahan punika, raris manados wentuknyané sané mangkin.

Kawigunan

Tari Ranup Lampuan ketahnyané kasolahang olih para pragina istri. Akéhnyané pragina punika ketah 5-7 pragina. Ring sasolahannyané, para pragina nganggén busana tradisional sané becik taler makta puan miwah basé sané jagi kasuguhang majeng para tamiu. Kairing antuk musik tradisional, para pragina masolah ring ajeng para tamiu miwah pamiarsa.

Gerakan sajeroning Tari Ranup Lampuan puniki akéhan madaging gerakan sané lemah lembut pinaka lambang kesopanan miwah ketulusan para pragina. Yéning kacingak, saluir gerakan ring sasolahan puniki madué makna khusus. Gerakan-gerakan punika minakadi gerakan salam sembah, ngalap basé, ngwangsuh basé, menyapukan kapur, ngaturang gambir miwah buah, taler sané kaping untat inggih punika misuguhang basé majeng para tamiu.