Tari Melemang

Tari Melemang inggih punika sasolahan khas saking Kepulauan Riau. Yadiastun Kepulauan Riau nampek sareng Singapura miwah Malaysia, sakewanten nenten nyurudang semangat kramane mangda tetep nglestariang budaya leuhur. Tari Melemang tetep lestari saking dumun kantos mangkin.

Lelintihan

Tari Melemang pinaka sasolahan asli saking Kepulauan Riau, pamekasnyane wit saking Tanjungpisau Negeri Bentan Penaga, sane wenten ring Kecamatan Bintan. Sasolahan puniki pinih ajeng kasolahang duk abad ka-12. Dumun, Tari Melemang manados sasolahan sane wantah kasolahang ring istana Kerajaan Melayu Bentan. Pusat kerajaan puniki taler magenah ring Bintan, pamekasnyane ring Bukit Batu. Dweg punika, Tari Melemang dahat kaloktah ring wawidangan istana miwah setata kasolahang matatujon ngibur raja miwah pangede ring wawidangan istana.

Sasolahan puniki kabaos istimewa duaning wantah kasolahang mantuk raja ritatkala raja sedek masandekan. Duaning rumasuk sasolahan istana, pragina Tari Melemang wit saking dayang-dayang kerajaan Bentan. Daweg Kerajaan Bentan runtuh, Tari Melemang nenten malih manados sasolahan istana, sakewanten manados sasolahan panglila cita parajana.

Daweg Kerajaan Bentan runtuh, Tari Melemang akeh kasolahang olih parajana. Kantos mangkin, Tari Melemang kantun kasolahang ring akeh acara, umpami upacara, pentas seni, miwah pestipal. Tari Melemang taler kauningin pinaka khasanah sasolahan khas krama Melayu.

Makna

Daweg wantah kasolahang ring wawidangan istana majeng para raja, Tari Melemang madue kawigunan pinaka panglila cita raja. Sasolahan puniki nyritayang indik raja ring kerajaan, antuk maduang unsur sasolahan, musik, miwah tembang. Sakewanten, sasampune kasolahang ring sisi istana, sasolahan puniki tiosan pinaka panglila cita taler pinaka kawigunan sosial masyarakat. Paiketan parajana miwah nyikiang parajana mangda sayan rumaket. Kantos mangkin, Tari Melemang tetep manados sasolahan sane ngibur miwah pinaka sarana nyikiang parajana.

Dumun sasolahan puniki wantah wenten ring Tanjungpisau. Sakewanten, mangkin sampun wenten saking Daik kantos ka Lingga. Sasolahan sane dumun kadruenin olih kerajaan, mangkin manados druen krama.

Pragina

Sajeroning sasolahannyane, Tari Melemang kasolahang olih 14 diri. Ring pemain inucap wenten sane manados raja, permaisuri, puteri, 4 pemusik, penyanyi, miwah 6 pragina. Duaning, ring sasolahan Tari Melemang maduang musik, tembang, miwah gerak tari.

Daweg masolah, para pragina nganggen busana tradisional Melayu miwah mapayas jegeg miwah menarik. Para pragina taler kapayasin antuk payasan khas Melayu nganutin peran sane kasolahang. Sasolahan puniki kairing antuk musik miwah tembang Melayu sane mawirama lengut. Gerakan para pragina dahat lemuh pisan. Musik miwah tembang manados pangiring ring saluir rangkepan gerak sane kasolahang. Gerak sane pinih seru saking sasolahan puniki ritatkala pragina ngamargiang gerakan ngadek sinambi mongkokkan angga ka ungkur, sane mautsaha ngambil sapu tangan utawi tiosan sane kagenahang ring bataran.

Musik Pangiring

Alat musik sane kanggen ngiringin Tari Melemang inggih punika akordion, gong, biola, miwah tambur.

Busana

Para pragina nganggen busana baju adat Melayu. Pragina istri nganggen baju kurung panjang miwah kain utawi sarung panjang ring sornyane. Miwah pragina lanang nganggen baju kurung panjang miwah celana panjang. Maweweh nganggen topi utawi kopiah mawarna selem.