Tari Legu Sahu

Tari Legu Sahu inggih punika sasolahan sané mawit saking propinsi Maluku Utara. Sasolahan puniki mawit saking kruna legu sané maartos pésta, miwah sahu sané maartos suku ring Maluku Utara. Nika mawinan Legu Sahu maartos pésta krama Sahu sané pinaka ciri rasa seneng para kramané ri tatkala manén padi. Pésta perayaan panén punika kalaksanayang nyabran warsa tur sampun dados tradisi ring wewengkon punika. Saking perayaan panén puniki raris wénten sasolahan puniki sané mawiguna antuk ngaturang suksma krana sampun prasida panén padi ring wewengkon punika. Tari Legu Sahu punika kasolahang dados hadiah majeng ring Sultan Térnaté utawi nyambra Sultan, miwah tamiu penting. Ring tarian puniki nénten wénten syair pengiring, nganggén musik tradisonal manten. Alat musik sané kaanggén ngiringin inggih punika tifa, utawi ketah kawastanin didiwang miwah gong ageng miwah gong alit sané mawasta kenong.

Gerakan

Ring gerakan tari Legu Sahu, pragina lanang madué gerakan cokor marupa ayunan cokor ka malu, ka samping kébot, miwah ka duri. Gerakan puniki nyihnayang ngamersihang padang ring rurung sané pacang kaliwatin. Antuk tarian sané kalaksanayang olih pragina istri, nyihnayang kasih sayang majeng ring anak lianan, magésér ka kébot miwah ka tengen, sané pinaka cihna anak ngenjek padi sasampun panén. Lianan saking punika, wénten taler gerakan lanang miwah istri ring sasolahan punika sané nyihnayang rasa manyama braya, miwah rasa seneng ring pésta krama Sahu sané sedek kalaksanayang.