Tari Gopala

Tari Gopala inggih punika silih tunggil sasolahan sané wénten ring Bali. Gopala wantah kruna saking basa Kawi sané madué arti pangangon sampi. Tari Gopala kakaryanin ring warsa 1983 kaambil saking punggelan carita fragméntari "Stri Asadhu" karya Ibu Ketut Arini, S.St. Penata tari puniki inggih punika I Nyoman Suarsa miwah penata tabuh inggih punika I Ketut Gedé Asnawa, MA. Tari Gopala kasolahang olih 4 - 8 pragina muani. Tari puniki wantah pralambang pakaryan pangangon ring carik sakadi gerak sampi, ngarit padang, ngulah kedis, membajak carik, manyi padi miwah gerakan-gerakan tiosan sané nganutin pakaryan petani.

Baju Tari Gopala

Tari Gopala kasolahang nganggén baju sané mabinayan sareng tari Bali lianan. Pragina Tari Gopala nganggén celana polos tiga perempat elastis sareng kamben makancut ring arep miwah duri. Sabuk prada lantang 10 – 15 cm, kacu utawi kain persegi sané kalipet dados segitiga ring arep tur kaiket ring duri. Nganggén udeng utawi déstar, saput utawi kampuh mawarna poléng (hitam putih), gelang kana kain, miwah bunga ring karna.