Tari Beksan Lawung Agung

Tari Beksan Lawung Agung pinaka silih tunggil sasolahan pusaka duén Keraton Yogyakarta sané mapaiketan ring ritual kanegaraan. Sasolahan puniki karipta olih Sultan Hamengku Buwana I. Sajeroning tari beksan lawung agung puniki nyinahang para wadua-wadua keraton mauruk mayudda saha malajah indik ksatrian nganggén tumbak. Wiraga tari beksan lawung agung puniki taler nyinahang ksatria sané dahating mautama, wicaksana, saha mataksu. Tari beksan lawung agung nénten wantah ngigel kémanten, nanging taler nganggén pabligbagan mabasa Jawa, Melayu, miwah Madura. ^[1] Tari Beksan Lawung Agung ketah kasolahang rikala wénten parikrama pawiwahan agung sentanan Sultan ring Kepatihan. Para pragina nyarengin sang alaki rabi nuju Kapatihan. Ipun makasami menekin kuda sané kasarengin antuk Bregada Wirabraja saha kairing antuk gamelan Kiai Guntur Sari.

Lelampahan (Tokoh) Tari

Tari Beksan Lawung Agung maderbé lima lelampahan, inggih punika:

Jajar inggih punika papat pragina nglampahin dados wadua anom. Sajeroning soroh wadua, jajar puniki linggihnyané paling sor.
Lurah inggih punika papat pragina sané manados wadua pinih waged saha linggihnyané sampun ring duur. Pragina nganggé wiraga kalang kinantang sané mateges luih wicaksana. Jajar miwah lurah pada mayuda marepan.
Botoh inggih punika kalih pragina sané ngadu kawagedan waduanné soang-soang.
Ploncon inggih punika papat pragina sané madué amongan ngisiang tumbak sadurung kanggén olih jajar miwah lurah.
Salaotho inggih punika kalih pragina pinaka Abdi Dalem sané mabebanyolan saha satya majeng soang-soang botoh. Pragina puniki nganggén wiraga gecul sané dahat banyol. ^[2]

Pakem Runtutan/Dérékan (urutan) Tari

Sawusan margiang saluir parikrama pawiwahan ring Keraton, kalanturang antuk pamargin arak-arakan saking kraton nuju kepatihan. Ring sor puniki runtutan pairingané.

Runtutan sané pinih ajeng inggih punika balawadua Wirabraja sané makta bendéra miwah genderang kairing antuk gamelan miwah abdi dalem ungel-ungelan, saha tandu pangantén pradana sané taler kasarengin sang purusa nunggangin kuda.
Ring ungkur pangantén purusa wénten sang sané makta piranti ampilan basé, pasametonané, saha pragina édan-édanan.
Dérékan salanturipun inggih punika para pragina Lawung Ageng kairingang antuk gamelan Kiai Guntur Sari sané nembangang tembang Sabrangan. Runtutanipun, minakadi:

1. Pragina salaotho ngiringang antuk mamargi
2. Abdi dalem makta tumbak pragina
3. Botoh, nunggangin kuda kapajengin antuk songsong kebesaran. Beksan puniki manados cihna panyanggran rauhnyané sang maharaja.
4. Lurah nunggangin kuda sakéwanten nénten kapajengin.
5. Jajar taler nunggangin kuda nénten kapajengin.
6. Ploncon pateh majeng lurah miwah jajar. ^[3]

Pustaka

↑ Media, Kompas Cyber (2021-03-16). "Beksan Lawung Ageng, Tarian Pusaka Keraton Yogyakarta Halaman all". KOMPAS.com (ring Indonesia). Kaaksés 2023-03-12.
↑ "Perkembangan Beksan Lawung Ageng – UKM Swagayugama" (ring Inggris). Kaaksés 2023-03-12.
↑ Redaksi, Tim (2023-01-27). "'Menari' dengan Biola: Interaksi Musikal Iringan Tari Beksan Panji Sekar". Nusantara Institute (ring Indonesia). Kaaksés 2023-03-12.

[1] Media, Kompas Cyber (2021-03-16). "Beksan Lawung Ageng, Tarian Pusaka Keraton Yogyakarta Halaman all". KOMPAS.com (ring Indonesia). Kaaksés 2023-03-12.

[2] "Perkembangan Beksan Lawung Ageng – UKM Swagayugama" (ring Inggris). Kaaksés 2023-03-12.

[3] Redaksi, Tim (2023-01-27). "'Menari' dengan Biola: Interaksi Musikal Iringan Tari Beksan Panji Sekar". Nusantara Institute (ring Indonesia). Kaaksés 2023-03-12.

[1]

[2]

[3]