Taman Nasional Taka Bonératé

Taman Nasional Taka Bonerate inggih punika taman pasih sané madué wewengkon atol sané pinih ageng katiga ring sajebag jagaté, sasampun Kwajifein ring Kepulauan Marshall miwah Suvadiva ring Kepulauan Maladéwa. Jimbar atol puniki 220.000 héktare tur irika wénten akéh terumbu karang, jimbarnyané sawatara 500 kilométer. Wewengkon puniki magenah ring Kecamatan Takabonerate, Kabupatén Kepulauan Selayar, Sulawési Selatan, Indonésia. Saking warsa 2005, Taman Nasional Taka Bonerate sampun kacalonang ka UNESCO dados Situs Tetamian Jagat. Ritatkala rahina embas Kepulauan Selayar, ring genah puniki nyabran warsa kalaksanayang pestipal sané untengnyané indik Sail Taka Bonerate utawi sadurungnyané kawastanin Takabonerate Island Expedition (TIE).

Taman Nasional Taka Bonératé
IUCN Kategori II (Taman Nasional)
Taman Nasional Taka Bonératé Genah ring Kabupatén Kapuloan Selayar, Sulawesi miwah Indonésia Taman Nasional Taka Bonératé Taman Nasional Taka Bonératé (Sulawesi) Taman Nasional Taka Bonératé Taman Nasional Taka Bonératé (Indonésia)
Genah	Kabupatén Kapuloan Selayar, Sulawesi Kelod, Indonésia
Nampek kota	Bénténg
Koordinat	6°41′S 121°9′E
Jimbar	5,307 km²
Kaadegang	1992
Sané Ngalola	Kamenterian Palemahan Urip miwah Kawanaan

Pulo Latondu ring Taman Nasional Taka Bonerate

Wénten sawatara limolas pulo ring Taman punika, nika mawinan ring genah punika prasida nglaksanayang akéh kegiatan, sakadi nyelam, snorkeling, miwah wisata bahari sané lianan. Topograpi wewengkon puniki menarik, krana atol puniki kapah dados gugusan pulo gosong karang miwah rataan terumbu sané jimbar tur tenggelem, tur ngawentuk pulo-pulo sané akéh. Ring pulo-pulo punika wénten selat-selat sané cupit, dalem, tur abing. Lianan saking punika ring permukaan rataan terumbu, wénten akéh kolam alit sané dalem tur wénten terumbu karang sané ngelilingin. Ritatkala yéh irika surut pinih éndep, prasida kacingakin daratan sané tuh tur genangan yéh alit sané ngawentuk kolam-kolam alit.

Soroh Entik-entikan

Soroh entik-entikan sané wénten ring Taman Nasional Taka Bonerate, inggih punika:

• Makudang-makudang soroh koral (Pocillopora eydouxi, Montipora danae, Acropora palifera, Porites cylindrica, Pavona clavus, Fungia concinna)
• Punya nyuh (Cocos nucifera)
• Pandan pasih (Pandanus sp.)
• Cemara pasih (Casuarina equisetifolia)
• Ketapang (Terminalia catappa)

Soroh Buron

Ring Taman Nasional Taka Bonerate wénten sawatara 295 soroh ulam karang tur makudang-kudang soroh ulam sané kaajeng tur madué nilai ékonimis sané tegeh, sakadi kerapu (Epinephelus spp.), cakalang (Katsuwonus spp.), ikan napoleon (Cheilinus undulatus), miwah baronang (Siganus sp). Lianan saking puniki, wénten taler 244 soroh moluska, sakadi lola (Trochus niloticus), kerang kepala kambing (Cassis cornuta), triton (Charonia tritonis), batulaga (Turbo spp.), kima sisik (Tridacna squamosa), kerang mutiara (Pinctada spp.), miwah nautilus berongga (Nautilus pompillius). Soroh penyu sané wénten irika, minakadi penyu sisik (Eretmochelys imbricata), penyu hijau (Chelonia mydas), miwah penyu lekang (Dermochelys coriacea). Terumbu karang sané sampun kacatet wénten sawatara 261 soroh saking 17 pamili, sakadi Pocillopora eydouxi, Montipora danae, Acropora palifera, Porites cylindrica, Pavona clavus, Fungia concinna, miwah sané lianan. Saking makasami soroh karang punika, akéh sané sampun ngawentuk terumbu karang atol (barrier reef) miwah terumbu tepi (fringing reef). Makasami terumbu karang punika, ngulangunin posan miwah ketahnyané kantun jangkep.

Ékowisata

Ring galah kerajaan Boné, wewengkon puniki kawastanin Bone Riattang sané artosnyané kerajaan Boné ring kelod utawi gundukan bias ringg kelod. Ring galah kerajaan Gowa kawastanin Bone Irate, sané artosnyané kerajaan Gowa ring kelod uatwi gundukan bias ring kelod. Wénten taler sané ngicénin artos Taka Bonerate punika dados hamparan karang ring ajeng bias (Molengraff 1929) ring "Sebaran dan Perkembangan Terumbu Karang di Indonésia Timur" midartayang Taka Bonerate dados Atol Harimau utawi Tiger Island. Wasta-wasta pulo ring Taka Bonerate sampun tigang kali mauwah inggih punika, wasta sané kaicén olih Molengraff ring warsa 1929, wasta ring peta Dishidros, miwah wasta sané kaanggén ngantos galah puniki ring krama lokal.

Wasta Kepulauan Macan kaicénin makudang-kudang artos sané malianan. Artos sané pinih logis ngaitang wasta punika sareng wentuk wewengkon tur genah taka ring dagingnyané sané marupa gigi macan sané mangan tur rapet. Nika nyihnayang peringatan majeng ring manusa, inggih punika sira sané jagi ngranjing ka wewengkon punika patut uning indik kepulauan punika. Yéning ten uning, sang sané ngranjing punika pacang nénten dangan medal krana kacihnayang sampun wénten ring bibih macan. Wasta pulo-pulo, taka-tak, miwah gusung sané ngawentuk Kepulauan Macan sané mangkin kasebut Kawasan Taka Bonerate, artosnyané makaitan sareng sumber daya sané wénten miwah peristiwa lelintihan, sosial ékonomi, miwah politik para kramané ring galah sané sampun lintang.

Taman Nasional Taka Bonerate madué makudang-kudang pulo sané sampun mauwah dados genah meneng, krana wewengkon puniki akéh sumber daya pasih sané prasida nyangkepin kauripan para nelayan. Krama sané meneng iriki ngantos 5.101 urip sané kasebar ring makudang-kudang pulo, sakadi Pulo Rajuni 1.272 urip, Pulo Tarupa 1.204 urip, PuloLatondu 512 urip, Pulo Jinato 651 urip miwah Pulo Pasi Tallu 1.462 urip. Lianan saking wisata bahari, wewengkon puniki madué makudang-kudang genah masejarah sajadi Taka Mariam genah meriam kuno druwén tentara Belanda miwah Taka Gantarang sané nyimpen meriam kembar druwén dagang-dagang Cina ring galah sané sampun lintang.