Schutzstaffel

Schutzstaffel (SS; taler magaya ᛋᛋ antuk rune Armanen; pengucapan ring basa Jerman: [ˈʃʊtsˌʃtafl̩] (renge^ⓘ); terj. har. Skuadron Pasaiban) inggih punika organisasi paramilitér sané utama ring sor Adolf Hitler lan Partai Nazi ring Jerman Nazi, lan salanturné ring sajebag Éropa sané kajajah olih Jerman salami Yuda Jagat II.

Kakawitin antuk unit panjaga alit sané kaloktah dados Saal-Schutz ("Kaamanan Aula") sané kawangun antuk sukarélawan partai anggén ngicénin kaamanan ring paruman partai ring München. Ring warsa 1925, Heinrich Himmler nyarengin unit punika, sané duk punika sampun karéformasi lan kaicén wastan sekadi sané kaping untat. Ring sor pangarah-arahnyané (1929-1945) punika nglimbak saking formasi paramiliter alit salami Républik Weimar dados silih tunggil organisasi sane pinih kuat ring Jérman Nazi. Saking aab Partai Nazi ngambil kuasa ngantos rézim runtuh ring warsa 1945, SS dados lembaga kaamanan sané pinih utama, pangawasan massal, lan térorisme negara ring Jerman lan Éropa sane kajajah olih Jerman.

Kalih sekaa konstituén utama inggih punika Allgemeine SS (SS Umum) lan Waffen-SS (SS Masenjata). Allgemeine SS madué sesanan ngukuhang kewijakan rasial Jerman Nazi lan kapolisian umum, nanging Waffen-SS kawangun antuk unit partempuran SS, antuk kasatyan sané masumpah majeng ring Hitler. Komponen kaping tiga saking SS, inggih punika SS-Totenkopfverbände (SS-TV; "Satuan Tendas Tengkorak"), ngamargiang kamp konséntrasi miwah kamp pralina. Subdivisi wewehan saking SS minakadi Gestapo miwah organisasi Sicherheitsdienst (SD). Dané sareng sami polih sesana antuk nyelehin musuh sané sujati utawi sane pacang rauh saking negara Nazi, napi kemanten nétralisasi oposisi, ngamong panjak Jerman antuk komitmené majeng ring idéologi Nazi, miwah ngicénin informasi intelijén doméstik miwah dura negara.

SS inggih punika organisasi sané pinih nanggung jawab antuk pamatian génosida kirang langkung 5,5 ngantos 6 yuta Yahudi lan yutaan korban sané lianan salami Holokaus. Anggota saking makasami carangné ngamargiang kadursilaan yuda lan kadursilaan majeng kamanusaan salami Yuda Jagat II (1939–45). SS taler nyarengin ring utsaha komérsial miwah eksploitasi napinan kamp konséntrasi pinaka budak kasar. Sasampuné Jerman Nazi kakaonang, SS lan Partai Nazi kaadilin olih Sidang Militer Internasional ring Nuremberg dados organisasi kriminal. Ernst Kaltenbrunner, manggala departemén utama SS sane pinih tegeh sané kantun maurip, kapanggihin iwang antuk kadursilaan ipun majeng ring kamanusaan ring sidang Nuremberg lan kagantung ring warsa 1946.