Sang Anganggé:Angayubagia/Siva tattva purana

Siva tattva purana inggih punika silih tunggil lontar tattwa.

Daging

Om Awighnam astu.

Śiwa Tattwa Puraṇa ta haranya.

Om Śiwa ya namaḥ. Hana Surâlaya ta haran ing bhuwana. Sanghyang Jagatpati madĕg ngkāna. Tka ta we hayu, ri kāla wulan harane kartika māsa. Apan sira masatine bhade para sanghyang makabehan. Nora hana waneh de para suta alunggluh ring padmaṡiwâsana mās tatur, rinĕngga-rĕnggêng maṇik ratna kumñar lwir sūrya prabhā, abhūșaṇa mañca rūpa, cinatra rub mawarṇa, ginawa de Bhūta Mañca Warṇa. Wus mangkana ḍatang kang parâtmaja nira, lwir haran ira. Sanghyang Brahmā, ḍatang ing kidul, bāng warṇa tka ning bhūșaṇa, acatra rukma. Iniring de Bhūta Bāng. Ring Brahmāloka nāgara nira. Saking kidul pwa ya mtu. Sanghyang Wișṇu ḍatang ing lor. Hirĕng warṇa tkêng bhūșaṇa, acatra sūkșma kumñar. Iniring de Ki Bhūta hirĕng. Wișṇuloka haran ing bhuwana nira. Sanghyang Iṡwara ḍatang ing pūrwa. Abhūșaṇa sarwa pṭak, acatra sūkșma ṡweta. Iniring de Ki Bhūta Putih. Iṡwaraloka haran ing bhuwana nira. Sanghyang Mahādewa, ḍatang ing kulwan. Abhūșaṇa pīta warṇa, acatra sūkșma lwir ratna kumñar. Iniring de Ki Bhūta Kuning. Rudra bhuwana haran ing nāgaranya. Sanghyang Mahêṡora lāwan Indra, mijil gneya. Abhūșaṇa pṭak awor bāng, lwir kĕmbar warṇanya. Acatra pṭak asmu bāng. Iniring de Ki Bhūta Saliwah. Indra bhuwana haran ing bhuwana nira. Sanghyang Śașa Rudra ḍatang saking nairiti. Abhūșaṇa bāng awor pīta, lwir sūrya prabhā. Iniring de Ki Bhūta Kwantha. Rudraloka haran jagat nira. Sanghyang Śangkara, ḍatang ing wāyawya deṡa. Abhușaṇa sarwa hijo. Apayung ratna kumñar. Iniring de Ki Bhūta Wilis. Śangkara loka nāgaranya. Ḍatang Sanghyang Aṡwinodewa, abhūșaṇa mañca rūpa. Apayung sūkșma kumñar, manghyun-hyunin warṇa nira. Śwaraloka nāgaranya. Ḍatang Sanghyang Dharmika abhūșaṇasarwa dadu. Apayung ratna kumñar. Hanaloka haran ing bhuwana nira. Ḍatang Sanghyang Kāla, akaronan Sanghyang Glap. Kagiri-giri rūpa nira. Abhūșaṇa poleng bāng. Acatra saliwah. Iniring de ning Bhūta Anggarūpa. Mtu saking ṡūnya deṡa. Ḍatang Sanghyang Bāruṇa, abhūșaṇa sarwa êndah. Bhuwanaloka haran ing bhuwana nira. Sanghyang Rawi, ḍatang ing gambur anglayang. Abhūșaṇa ngaṇitri, asalumpit kumñar angdhapa paying ṡweta warṇa. Ring Sūryaloka nāgaranya. Sira kânggĕh sākșī ning ujar dewa prahyang makabehan. Sanghyang Kuwera kaping untat. Abhūșaṇa sarwêndah. Ḍatang ing lor kulwan. Apayung pīta rinukmi. Iniring de Bhūta Ro. Kuweraloka ngaran bhuwana nira. Untat nira Sanghyang Yama, ḍatang saking kidul lwir kāla rūpângrĕs polah ira. Abhūșaṇa poleng bāng, acatra tiga warṇa. Kumñar angdhap. Iniring Bhūta Saliwah. Yamaloka ngaran ing bhuwana nira. Prasama dewa sanggha langit. Ḍyĕm, tan hana wanya mojar, Irika Sanghyang Jagatpati ataña ring sira samūma.

Aum, kabeh mangkya wus pūrṇa Surâlaya. Antyan wrĕddhi hayu ning Suraloka, tar knêng ujar, lami pwa ya bapa muktyakĕn skar ing Surâlaya. Hiḍĕp pwa ya bapa līna ning ṡarīra. Kadyangapa ajña ta kabeh anakku. Taham pwa nghulun. Hulun anakta Sanghyang Brahmā, Wișṇu. Tuku pakulun yan amralīna ṡarīra. Antyan kasyasih pinakanghulun maṡawa. Makārya hulun padma lingga ning ṡawa yan nora maṡawa pwanghulun. Akārya hulun reka lingga ning taru, ya tika ginawe padma, abhūșaṇa sarwa pṭak. Magawe hulun panilĕman ri kāla we hayu, kiñcĕl sira lāwan kajang sinurat kottama ning akșara. Kang ṡawa maturakĕn saji-sajinya. Lĕmbu hirĕng lingga ning pādukangku. Irikā pwa magawe hulun kșetra gnah amasmī ṡawa. Wus bhinasmī, irikā duduk tahulan pādukangku ginawa ning dwĕgganyuh danta. Awastra pṭak, madaging kawangen Martha jĕpun, thĕr mañut ḍatang ing samudra, suntaka hulun pañca hri, tar wnang ñīșya lakșaṇa, ikā haran ing atiwa-tiwa, ingaranan ngaben. Ngaben pwa ya nghulun.

Wus mangkana wnang haran ing ātma olih lungguh amor ing Surâlaya. Saking rika ingaranan Dewa Pitra. Môjar Sanghyang Jagatpati. Tahamtânakku. Wijñananku ring pakrĕti. Ah tânakku. Mwah yan hulun maṡarīra ratu abala bhyuh, kady angapa glarantânakku. Mwah kāla hulun maṡarīra Brahma kula, Śudra kula. Katka tkêng mātya ṡarīra. Kady angapa karĕptânakku. Singgih yan mangkana, kinārya hulun badhe kang nișṭa, madhyôttama. Kang uttama atumpang-tumpang. Hana tumpang sawlas miwah tumpang sanga, tumpang sapta, tumpang pañca, lāwan catur. Irikā ṡawa kottama. Anāga bandha ta haranya. Badhe winilĕt apiṇḍa Takșaka. Ginawe bhūșaṇa nira amañca warṇa, dinulur lĕmbu, baṇḍusa, abale along salunglung haranya gnah ing patulangan. Mungguh pwa nghulun ri badhe, mawa nghulun pcut mêsi roma ning manuk dewatā. Raris mamārgi ikang badhe mungsi kșetra. Hana amañjang, nga. Mawa artha sinker urā, ḍatang i catușpatha, midĕr tang badhe ping, 3. Ḍatang pwa ring kșetra, mwah midĕr ping, 3. Iniring tatabuhan, haran ing, gong, gambang mwang angklung. Wus mangkana ring lĕmbu, irikā binrĕsihan de ning tīrtha. Kôttama awadhah paruk mêsi pangleb, simsim maṡoca mirah, miwah paripih paḍa sinuratan haran ing tīrtha panglĕpas, miwah tīrtha widhi widhāna. Wus mangkana, bhasmīkna kang ṡawa de ning agni. Pet tahulanya binrĕsihan gnahakĕn miwah reka, apiṇḍa waktra, angga, tangan, suku, inugning taru ṡakti, miwah pinupulakĕn ring dwĕgan nyuh danta. Bhūșaṇanĕn sarwa pṭak, inañut ḍatang ing wwe agung. Wus ika cuntaka pwa nghulun, nișṭa, madhyôttama. Sang wiku, 5, rahina. Walaka, 10, dintĕn. Pamgatnya tahulan pitung hri, kadi ikā. Yan during wnang widhi widhāna. Taham pwa anakku. Gumantya môjar Sanghyang Rudra lāwan Mahādewa. Singgih pukulun, ri wus atiwa-tiwa, hulun pwa ya ginawe skah. Kôttamanya, sarwa skar anggen ahyas ikang skah. Pring wuluh wnang pâwakanya, tinampih de rwan ing waringin. Ikā pwa inahyasan skar. Nhĕr inaturan saji. Miwah inañut ring wwe agung. Lbar kang cuntaka, wnang awidhi widhāna. Taham pwânakku kita. Umôjar Hyang Iṡwara lāwan Mahêṡora. Hulun ginawe skah kuning, nga. Añucya lakșaṇa ikā. Tka ning iwak saji-sajya sarwa ṡuci wnang. Tahamtânakku. Môjar Sanghyang Gaṇa lāwan Sanghyang Umā. Hulun gumawe bukur, tar wnang wong camah, wong caṇḍala, buta, tuli, kurang lĕwih, cedângga, wong hayu juga wnang. Môjar Hyang Indra Hyang Samara. Hulun ginawe ligya, nga. Tur wnang ing sor sarwa kinārya, ginawe pwa ya panggungan, nga. Môjar mwah Sanghyang Bāyu mwang Sanghyang Bāruṇa. Sanghyang Kāla, lāwan Sanghyang Sūrya, prasama makabehan. Singgih pakulun ginawe rāja kārya. Angluwĕr nāmanya. Apan hulun kaping untat, tan hana kôttamanya, maka wnang iwak ing saji-sajya. Daging samudra, miwah daging giri gahana, buron kidang pṭak, pakși sahanêng ṡucya lakșaṇa. Wwe Sarayu, Yamuna, Siṇḍu, Saraswatī, mwang Gangga. Ikā kôttama ning tīrtha. Tlas pwa sagati ning rāja kārya, dulur-duluran ing atiwa-tiwa. Taham pwânakku. Ênak pwa Sanghyang Jagatnātha, angreha ujari tmaja nira makabehan. Ah kitânakku kabeh. Hana wlaskwing dlāha mānușa pada ginawe mangkanya. Den wruh wwang ing madhyapada tata tithi ning anakku. Hyang Dūrmmika anakku. Kita ginawe mārga, mārga ning hayu warighā lāwan tĕnung, putru mwang pulutuk, den wruh wwang ing Madhya. Sanghyang Gaṇa lāwan Hyang Yama, kon angrākșa pitra hyang mānușa, anuju hana numadi mānușa hala lāwan hayu. Môjar Hyang Gaṇa lāwan Hyang Yama. Singgih andha pwa nghulun. Kêngĕtakna pwânakku. Yan wwang wus atiwa, putru nira dewa pitra. Yan wus akakangṡen, Sanghyang Pitra haranya. Yan wus ñkah, dewa sang pitara haranya. Yan wus abukur, Pitra Widhi haranya. Yan wus maligya, Widhiwaṡa Pitara ngaranya. Yan wus ngaluwĕr, Acintya Pramanaya Pitra ngaranya. Mangkana anakku. Taham pakulun. Mwah rĕngwakna anakku. Yan hana wwang Madhya pada pjah tatan hana ṡawanya. Tan inulatan, ikā wnang ginawe swastha. Mwah yan mātya prang, wnang amor ing licin. Yan mānușa maṡawa tan wĕnang swastha. Yan purug, matmah sasal makweh, matmah gagak susungan ngala-hala ring nāgara karma, mwah nalu. Yan wwang salah pātya, tar wnang upakāra, hĕntyakna, 3, tahun. Mwah yan ṡudratmaja salah wtu, caṇḍala tan samêng wwang, tka wnang ring catușpatha, sahulan sapta hri. Wus wĕnang, wnang uṡaba deṡa dewa ring kagnah lĕtĕh. Lwir upakāra, acaru mañca klud ring catușpatha ning nāgara karma. Mwah ring lĕbuh suwang, makadi ring pura-pura. Wus ikā wnang mangĕntĕg makiis, ngayu-hayu solas dina. Mwah yan hana wong ṡudra ngamet istrī brāhmaṇa kula, kșatriya kula, weṡya kula, ikā wnang daṇḍa, linbok ring wwe agung. Yan kari hurip, ring nāgara karma mtu asuta, ya tika ari-arinya caṇḍang api, trakang nāgara. Tawun tan dadi. Wkasan pjah jadma ikā, tar wnang supat sang sādhaka. Haywa ngĕntas pitranya. Yan ya murug, ātma naraka, dinaṇḍa de Sanghyang Yama Sang sādhaka ikā. Ya tika ṡrĕgala ngyĕgi prāsāda, nga. Apan tan wĕnang pradhāna ngawaṡa purușa, nga, laki. Pradhāna, nga, istrī. Saking laki juga wnang angalap. Marmanya tar wnang amurug. Taham pakulun. Mwah anakku, kêngĕtakna glar ing akșara maring wong pejah. Aja salah surup. Apan sang sādhaka wnang nglĕpas pitra ning wong pjah, sang catur jadma. Den anūtĕn wangṡa ning wong, aja anglwar ing anglĕwihi kawangṡanya. Tar dadi sang sādhaka tar wruh ing ṡarīra, pasuk wĕtwing akșara, yoga samādhi, utpatti, sthiti, pralīna. Tkêng daging ghaṇṭa, akșara mwang dewatānya. Ya nora sang sādhaka wruh ri putĕr-putĕran ing bajra pagĕnti-gĕntinya, aja angla parthâdi dakșiṇa. Tan wurung dinaṇḍa de Sanghyang Yamadipati, linbok ring tambra go muka. Rug ikang rāt, sĕndu Sanghyang Gurunātha, amrĕta tmah wișya, bhuwana maharig. Aja sang dīpa ning rāt tan wruha ring daṡa wara mārtha ning sang wiku. Nakku sang Śiwa Śrī Danta, aja angapdapakna nāga bandha. Wnang tânakku Bubukșah. Yan kitâmurug, inalap jīwanta de Hyang Takșaka. Mwah ri kāla ning sanghara bhūmi, wkasan ngĕtawuran ring panghulun ing bhuwana tiga. Ndi panghulunya. Tan waneh, sāgara, dhanu, wukir agung. Ya tika panghulun ing bhuwana. Ndah kawnanganya angêka daṡa rudra bhūmi. Sang sādhaka wnang harĕpakna dewatā. Ring Madhya Śiwa Buddha. Aja tan wruh ring ungguhan ing nawa dewatā, mawidya macatur gaṇa, paḍa ngadĕgakĕn sanggar rong tiga. Maka wnanganya, 5, tahun, ring wulan māsa haranya kartika. Ring sāgara panglĕb kang uttama, krĕwĕg asungu hema, bañak, banteng, paḍa abhūșaṇa mās, artha ṡakti nĕm daṡa saji ning bantĕn anūtakna kadi homa traya katkêng dhanu. Hênak pwa Sanghyang Antabhoga. Rĕngrĕng wdhĕking nyasing tinrap wwe ātma amrĕta. Murah ing bhukti nāgara karma. Yan nora tawuran, mapanas wdhĕkang Hyang Antabhoga, haring kang bhuwana, simirat wipananya liru dadi pasang. Sasab maraṇa magalak, amrĕta tmah wișya. Aja hima dīpa ning sarāt, wwe mawișya gni, sumurup ing bhuwana ro, mapanas hiḍĕp ing wwang sākșāt kĕnêng kāla kuṭi, apan sira Sang Antabhoga dhināraṇa dhināraṇa Sanghyang Kulagiri jaga bhūmi. Tlas larut dewatā ning nāgara rinuruh wișa nira Hyang Antabhoga. Dewa mūr, sasab magalak, alpa yușa kang wong. Apan Sanghyang Pṛthiwī mne matwa, mne manwam. Haywa sang ratu ning sarāt hima dinamĕl ring sarāt. Ya matmah corok-cinorok ring bhuwana. Ātma prang sumlur, tan olih lungguh sang catur janma. Mangkana kêngĕtakna, aja murug ling ing aji. Nakku kita. Kita Hyang Umā, den mawruh kadadyan ing wong. Hana Hyang Samara ring ṡarīra sowang-sowang, hana Sanghyang Harum, nga. Mungguh ring tungtung ing hiḍĕp, rūpa kadya mutiara. Mārganya ring otot ring cakșu. Ya ingaranan mwah hana mahning, mungguh ring table pṭak, mārga ning cakșu tĕngĕn. Miwah anglungsur lungguh, hana ring gdong mās, Sang Samara dadya kāma pṭak, Sanghyang Ratih manadi kāma bāng. Wus anunggal munggah ring caṇṭik gĕdong mās, sira ta matmu dadya sanunggal. Ya ta matmah rare. Ri wahu matmu rāga hring, nga. Wus mareka, Hyang Tīkșṇa, nga. Mareka rare, kula maya, nga. Angĕmpunya, yeh ñom, banah, ari-ari, nga. Rĕcamurddha. Ya matmah sāri ning pangan kênum. Ri sawulan, kulamanta, nga. Rong wulan, sĕṇḍung jāti, nga. Tigang wulan, Rekamaya, nga. Pātang wulan, Gaṇaning, nga. Harĕp umtu tibā ring pṛthiwī, anaknya ikā maprabheda haran, I Salahir, I Jalahir, I Makahir, I Kokahir. I Legaprāṇa hana ring rare. Dūk ari ring jro wtĕng kita kārya pagdongan, ya bhukti i jro wtĕng. Tibā ring pṛthiwī, bantĕn tatbasan, iwak sata nūt rare. Yan ya laki, sata laki wnang. yan ya wadon, sata wadon wnang. Wus roras dintĕn, tañanĕn wong rare. Don byakta lĕwih ing sang ḍatang, irikā ngaranan kamara tunggal. Māsa nira Sanghyang Tiga, wruh mabāyu, maṡabda, mahiḍĕp. Inghurip de Hyang Pṛthiwī haran Hyang Komara. Wus awulan, nga, Komara yajña, marĕngut sang dumadi ātma rikang rare. Wnang upakāra ginawe myak sih, dakșiṇa sarwa ro, sata, 2, pañnĕng, 2, artha, 250. Sambat Hyang Komara. Mwah karma ning cinolong, pamariṡuddha ning dumadi makanggoning rare, pan ring Hyang Yama ngupakāra kadya lagi. Ri wus, 3, wulan, mwah upakāranĕn ing bantĕn, madudus nawa ratna, lyan apṭik, nga. Ginunting roma ning rare, pinuling blayag. Ikā gantyani roma den abrĕsih, ginawe upakāra, pabangkit asoroh, mnek udhupji, ingastrenan de sang wiku. Pĕṇḍĕm romanya ring ulu ning sanggar. Pan sira weh tahulan ing otot, marma ning mabāyu, maṡabda, mahiḍĕp. Ri wus elan. Magawe wton tambyane, wnang rare tḍun ring pṛthiwī. Upakāranĕn, pane sawiji marajah padma, mêsi widang, urang, simsim, sata ginawe pitik tinangkĕb ing guwungan. Wus ikā wnang kang rare Nampak kșiti sakama-kama. Yan during sang ikā tar wnang kang rare gnahang ring kșiti. Hyang Pṛthiwī tan olih gañjaran mwang apṭik. Ri sampun, 3, wulan, wnang sapisanĕn. Miwah babantĕn ri kāla wonya, tatbasan, 1, tumpĕng mwah byakāla, tĕpung tawar, sahagan rumuhun. Tatbasan bāng, taluh syap, sabĕt ya ginawe pūrṇa ning kāla catur kang sarĕng mijil dūk ing rare. Mwang ri sampun wruh lumaku, wtu huntu ning rare, papagna sang rare sahyang ilat. Makārya bañjotan akelan, iwak taluh wus lama. Ri sampun angĕntyani huntunya, ya ikā wnang angajari wwang rare. Yan wus wruh inangwan, ikang rare, wnang tibāna daṇḍa ri sampun harĕp ing istrī. Mwah upakāranĕn huntunya, wnang haran ing atatah, upakāranya kadi wton. Hana wawalinya, angringgit, sang sādhaka wnang adudus agung. Mangkana karma sang uttama ning wangṡa. Wnang anganggen bhasmangkāra. Ri wus aswami, mwah upakāranĕn ring sanggar, kadya upakāra ning asinawung, lwir upakāra ring sor panlah kandĕl. Rika wus mwah adudus agung. Ya nora sah ikā, sang bhūta gowang angrañjing ring mānușa pada. Mwah yan apodgala karma ning sang paṇḍita, ginawe upakāra madudus anawa ratna, mapabangkit, masanggar rong tiga ya tika karma ning sang catur janma matmah mānușa. Mangkanânakku Sang Gaṇa. Taham pakulun. nakku Hyang Gaṇa, den apĕpĕk daging ing sura padma. Mwah ginawe akșara mārga. Taham pwanghulun. Sang Brahma kon ginawe mās maṇi ratna mirah. Mwah hanêng mrik, mñan așṭanggi. Sanghyang Wișṇu magawe wĕsi, malela, purasani, sahananing matmah sañjata. Sanghyang Sādhana kon agawe artha rajata pirak. Mwah Sanghyang Śakra kon agawe mĕṇḍung, teja, tlĕrĕp, mwah magawe lalanang nakbi, jainang, kadurung raja swala salwir ngênaki citta. Sanghyang Rudra, agawe paḍa gringsing, limar karongrong sahana ning lĕwĕs sutra katkêng wtil. Sanghyang Mahêṡora magawe unen-unen tĕkêng tatabuhan, murawa, mrĕdhangga, sahana ning tatabuhan den ênak swara. Sanghyang Śambhu, magawe bhogôpabhoga, Madhya maṇḍira ṡara. Sanghyang Śangkara, magawe ikang atiṡaya sakêng sabrang. Sanghyang Mahādewa, magawe suwarṇa kanana drawa jāti rūpa, atalĕpit, parasahan, miwah sarwa prāṇī. Hyang Sūrya magawe panas, Sanghyang Pṛthiwī ngamrĕtani bhuwana tiga. Nakku Hyang Gaṇa, sulur sorok parhyangan. Singgih pukulun. Môjar Hyang Girinātha. Ya dewa, ya sanghyang, ya Widhi, ya nūr, ya reka, ya tan pareka, ya ṡuci, ya campur, ya bhūta, ya kāla, ya ḍngĕn, ya Durga, ya sato, den mawruha lakunya sowang-sowang. Yan mangkana, taham wruh pwânakku, ginawe ratmaka. Rāt, nga, jagat, ma, nga, mārga, ka, nga, kāla. Den dhyâtmika ring mārga. Ya magawe pāpa swarga, pāti hurip. Singgih pukulun magawe dina, Sanghyang Brahmā, dadi pahing, Sanghyang Mahādewa dadi umanis, Sanghyang Wișṇu dadi wage, Sanghyang Śiwa dadi kliwon. Ikā mārga ning diwasa, inuring de bhūta mañca warṇa. Sang Buddha mayoga inugrahan de Hyang Adisūkșma bhutrêng bhuwana, sira matmah wuku Dungulan. Sanghyang Uddhaka dadi Buddha. Sanghyang Śiwa dadi Kliwon. Tri dadya tunggal, Buddha Kliwon, Dunggulan. Dadya ning dewa, 3, bhūta, 3, nga, Sang Kāla Tluning Dunggulan. Yan tan wĕnang noli sabuh rāh. Wong ing Madhya wnang magawe ya kāla. Wnang mānușa ngasthiti ikā. Tar wĕnang nggon diwasa atiwa-tiwa. Mwah ring Śukra pahing Dunggulanya, wnang kang mānușa manggung sañjata ya pangrĕbĕg. Radite Wage Kuningan, wnang wong ginawe sambutan, nga, Ulihan. Śaniṡcara Kliwon Kuningan, Pamacĕkan Agung, nga. Hyang Śiwa atmu ring Hyang Girinātha, dina rāh diwasa tmah dewa. Ya nora wwang abhiwyawāstha alpa yușa, ikā aja murug sawong ing Madhya. Dina Buddha Kliwon, Widhi, nga. Nakku, taham. Hulun matmu ring ibunta. ndi hayunya. Singgih pukulun. Śaniṡcara Kliwon Kuningan, aja sowe lunghā, mne awangsul. Apan Ibungku dadya Śaniṡcara. Pāduka, dadya Kliwon. Ya Kāla Durga, ya Widhiwaṡa. Śaniṡcara Kliwon Kuningan, tkêng Buddha Kliwon Pahang, tar wnang ring mānușa, ingaranan wuñcal walung. Hayu yan ring Widhi, maṡarīra Durga Kāla. Sakāryan mānușa hala, amasmi salwir ing luwun walungan, arĕngnya den pĕndhĕn de ning kwangen, sadulur gīta, nganĕm lek sira atmu. Iniring de watĕk dewatā kabeh. Ri kāla Anggara Wage Dunggulan, bantĕnin rong salanggi mêsi skul kuning, iwak calon ginantung-gantung tamyang kulĕm, bantĕn ikā aja liwar wngi. Mwah kāla Buddha Kliwon Dunggulan, bantĕn, soda putih kuning, jarimpĕn pajĕgan, pnĕk, iwak jajatah, ring lĕbuh peñjor siwang. Ya nora sah ikā, rug kang mānușa rinangsuk de Sang Kāla Tiga. Mwah ri tilĕm ing kasanga, hulun ginawe yoga. Tka wnang wong ing Madhya ginawe tawur, mwang ñĕpi sadintĕn. Den hana prang ing satha ya lalapĕn Sang Kāla Bhūmi. Yan nora mangkana rug wong ing Madhya. Yan ring ṡaṡih Jyeșṭa, Saddha, pwa nghulun, yan ring ṡukla kṛșṇa, pūrṇama tilĕm pwa nghulun. Yan ring taru, dewaṇḍaru nghulun. Yan ring giri, Sumeru nghulun. Den wruh ring kadyangku, anakku. Ring Dunggulan, tkêng utang, dinawur utang, tka wnang alahta rucapĕn. Mangkana kita ginawe warighā. Wa, nga, putus, ri, nga, patĕmwan, ga, nga, ṡarīra. Tan wruh ring patĕmwan kāla lāwan dewa, kalāwan mānușa, wnang liwar tar wnang. Ākāṡa lāwan Pṛthiwī, sāgara lāwan dhanu, pāti lāwan hurip, nmokĕn Sanghyang anadyakĕn warighā. Taham pwa nghulun. Tan kêwĕh pwa ya ngku. Ginawe mārga ning para dewatā mwang mānușa, hulun anggawe tri lingga, nga, tiga lingga, lungguh. Hyang Brahmā, dadi kajĕng maṡarīra panas. Iniring bhūta maling. Sanghyang Wișṇu dadi pkĕnan. Sanghyang Śiwa dadi Pasah. Ya mārga ning Śiwa, ya suwung, nga, ṡūnya, nga, sĕpi, tan amangguh dalĕm lan katmu pinet. Kajĕng lan pkĕnan juga wong ing mahayu ṡarīra. Mangkana nakku. Singgih pukulun. Kweh hulun ngawe, hana ring Mĕdhang Kamulan, hana pasasañjan, hana ring Suṇḍari Tiga, wuku ugĕr ing sapta wara. Taham nakku. Hyang Bāyu magawe sata ṡīkșa. Sira wijñāna anĕmpur ri paprang ing sata. Sanghyang Jagatpati madĕg ing sungsang. Hyang Bhrĕghu dadi Śukra, matmu lāwan Hyang Jagatpati. Wnang siwi de para hyang, wnang wong mānușa niwi. Ikā haran Sugihan ring janma tar wnang. Mwah Dhanghyang Wrĕhaspati lāwan Hyang Wișṇu. Mita sanmata ring Hyang Jagatnātha. Atmu gocara de ning Hyang Jagatnātha. Mutiara bhūșaṇa kanaka drĕwe, ya tmah Wrĕhaspati. Hyang Wișṇu, matmah Wage. Ya ngaran Sugihan. Wnang Sang …………………………………………………………………… Brāhamṇa wangṡa, Satriya wangṡa, wnang mahayu sama ning yajña. Ginawe parĕbonan. Kang Śudra, ṡukra kliwon. Mangkanânakku. Taham pukulun. Ah anakku, Hyang Rāditya, dadi radite. Hyang Candra dadi Coma. Hyang Brahmā Anggara. Hyang Wișṇu dadi Buddha. Hyang Indra dadi Tunglĕh. Hyang Bāruṇa dadi Aryang. Hyang Kuwera dadi Urukung. Hyang Bāyu dadi Paniron. Hyang Bajra dadi Wās. Airawaṇa dadi Kajĕng Maulu. Tar wnang atiwa ring janma, panagamya. Watugunung alah maprang lāwan Hyang Ari, winastu de Bhaṭāra Śiwa dumadya Krawan. Hyang Wișṇu dadya Was. Ikā wnang tūtĕn. Anakku Hyang Gaṇa. Taham pukulun. Bhagawān Bhasundari matmah catur warighā. Ya ngawĕtwakĕn salwir wwang mâmbĕk ring hayu. Bhaṭāra Garga magaway āmbĕk hala. Magaway āmbĕk bĕñcah, den katmu ring wong Madhya ring dlāha, kêngĕtakna aja murug. Mwah tânakku. Sanghyang Brahmā amāti ṡarīra tunggal salek. Tka wnang wong ing Madhya ngasthiti. Dina Anggara Kliwon. Sanghyang Wasu mayoga. Tunggal ring dina ikā, Sanghyang Wișṇu mandadi sañjata bajra, Sanghyang Paṡupati atulung anuronin, ginawa ring hyang Jagatpati ring dina Śaniṡcara Kliwon wuku Laṇḍĕp. Marmanya wnang wong ing Madhya ginawe wto ning sañjata. Sanghyang Adhisūkșma, mamĕng-amĕng ing Madhya pada marūpa lĕmbu, sinĕmbah de Hyang Guru ring dina Śaniṡcara Kliwon Uye. Wnang wong ing Madhya ginawe wĕton ing sarwa sato, lwirnya, banteng, kbo, ayam, bawi, salwir ing patik wnang, wnang ginawe prāṇī tka ning pakși. Dhanghyang Pulaha matmah taru-taru wlĕtik ing dina, Śaniṡcara Kliwon warighā. Wnang wong ing Madhya pada ginawe wĕton taru, sarwa taru, ya brāhmaṇa kula. Hyang Watugunung atmu ring dewī Sinta kasih ring dina, Buddha Kliwon Sinta. Tar wnang wong Madhya mahayu ṡarīra ring dina ikā, wnang wong Madhya ngaturakĕn bantĕn. Ya ngaran ing Pagĕrwĕsi. Gĕr, nga, matmu, si, nga, paṇḍita. Ya ngaran ing Pagĕrwĕsi. Hayu yan wong abantĕn. Hala anggen dewasa ring mānușa. Aja murug, ikā kêngĕtakna. Wong wruh ring aji, aja murug. Anakku Hyang Gaṇa. Taham pukulun. Den wruh hulun pwa Hyang Śiwa, dadi Anggara Kliwon. Irikā ibunta inuring ring sarwa kāla lāwan ḍĕngĕn, arūpa joti. Yan nora hulun ḍatang, tan dadi pwa ya rūpa Durga. Sḍĕk Hyang Udhaya kang hêtang dewasa kang dadya dina, sĕḍĕngnya nora marāga Kaliwa, ikā dadya Pwan. Mārga ning Pwan lanus hayu juga. Kajĕng Kaliwon, mabhūta yajña hayu. Hyang Brahmā atmu ring Hyang Śiwa, mānușa yajña, hayu magawe padhanan, mitra yajña, nga. Ya atiwa. Dewa yajña, nga. Hayu ngawidhi widhāna. Mangkana karma ning mānușa ngawe hayu ning ṡarīra. Katmu wrĕddhi dlāha ning dlāha, suru pakaṇḍah ing wyakșara phalanya. Madĕg ira Hyang Wișṇu, ginawe gama tīrtha, madĕg ira Hyang Indra, ginawe gamêndra. Madĕg ira Hyang Yama, ginawe Yam agama. Ya tika ingaranan mdhang kang bhuwana. Mwah yan hana wwang surupa kaṇḍahing wyakșara, ya cihna ning mtu ring mārga. Yan hana wwang jugul, kinêlik ing samanya, ya cihna ning mtu sakeng cambra go muka, tan adrĕwe ya yajñya, nga. Taham anakku, den pĕpĕka salwiran ing warighā. Singgih pukulun, wuku ginawe hulun, lwir patĕngĕranya. Sang Giri wara sira Hyang ing malayu, dadi wuku Sinta. Sanghyang Rajakutha, sira hyang ing Sutramu dadi wuku Laṇḍĕp, Sanghyang Mangkubhuwana sira hyang ing atanu. dadi wuku Ukir. Sang Rajabhuwana sira hyang ing hyang, dadi wuku Kurantil. Sanghyang Rajawakșa, sira hyang ing Bhrĕghu, dadi wuku Tolu, Sanghyang Rajawisuya, sira hyang ing parasuswara, dadi wuku Gumbrĕg. Sanghyang Ajñāna, hyang ing kawi, dadi wuku warighā. Sanghyang Langlang Bhuwana, dadi wuku Warigadyan. Sanghyang Ambulu hyang ing hĕmbun, dadi wku Julungwangi. Sanghyang Śiwa hyang ing nawa sanga, dadi wuku Sungsang. Sanghyang Buddha Cobhakșa, dadi wuku Dunggulan. Hyang Jnar sira hyang ing warṇa, dadi wuku Kuningan. Sanghyang Lĕnglĕng sira hyang ing êdan, dadi wuku Langkir. Sanghyang Mdhang hyang ning carma, dadi wuku Mĕdhangsya. Sanghyang Mpujāti, sira hyang ing puji, dadi wuku Pujut. Sanghyang Pangpang, hyang ing punggung, dadi wuku Pahang. Sanghyang Aswino, sira hyang ing wulangun, dadi wuku Krulut. Sanghyang Kaṡyapa sira hyang ing wakșya, dadi wuku Mrakih. Sanghyang Timoru, hyang ing barĕt, dadi wuku Mḍangkungan. Sanghyang Kojundang Bhuwana, hyang ing wrĕkșa, dadi wuku Matal. Sanghyang Iṡwara, hyang ing putus, dadi wuku Wuye. Sanghyang Raju hyang ing dharma, dadi wuku Mnail. Sanghyang Singha, hyang ing wīra, dadi wuku Prangbakat. Sanghyang Sanghara, hyang ing kāla, dadi wuku Bala. Sanghyang Caya, hyang ing sādhu, dadi wuku Ugu. Sanghyang Ringgit, hyang ing sangging, dadi wuku Wayang. Sanghyang Bhuwana, hyang ing mañca warṇa, wuku Kulawu. Sanghyang Śasa, hyang ing tṛṇa, dadi wuku Ḍukut. Sanghyang Kāla, hyang ing wĕging kamuru, dadi wuku Watugunung. Taham anakku. Pamtya kṛttining wuku, mwah ring ṡaṡih, ka, 1, Sanghyang Śiwa lingga ning Jyeșṭa Saddha. Sanghyang Kilingga, dadi Karo, Katiga. Sanghyang Dharma dadi Kapat. Sanghyang Pañcarĕși, Kalima.Sang Ṣaḍ Gaṇa dadi Kanĕm. Sanghyang Sapta Rĕși dadi Kapitu, Kawolu. Sanghyang Nawa Sanga dadi Kasanga. Sanghyang Daṡa Rudra dadi Kadaṡa. Taham anakku. Singgih pukulun. Yan ring tanggal, Sanghyang Trigaspati dadi tanggal, 1. Hyang Dharmameta, dadi tanggal, 2. Hyang Nāgarāja dadi tanggal, 5. Hyang Kumāra dadi tanggal, 6. Hyang Bāruṇa dadi tanggal, 7. Hyang Kālaghosa, dadi tanggal, 8. Sanghyang Kāla Taḍah, dadi tanggal, 9. Hyang Daṡarasa, dadi tanggal, 10. Hyang Dhanaswara, dadi tanggal, 11. Hyang Śangkara, dadi tanggal, 12. Hyang Takșaka, dadi tanggal, 13. Hyang Kāla Daṡabhūmi, dadi tanggal, 14. Hyang kabeh, dadi tanggal, 15. Tanggal lāwan panglong ring warighā wulikĕn. Yan wwang kêḍĕp bhikșuka, jahta wwang Madhya pada, haywa tan asthityan ing Widhiwaṡa. Yan kita murug, jah ta kita mangguh hala. Tan amangguh dala(n) apaḍang, tan sinupat ing janmanta. Ulikĕn ring nitya sampūrṇa, haja wihang. Tlas.

Kasurat antuk I Gusti Gdhe Bilih ring Padang Krĕttha, Amlapura, ring dina, A, Wa, Matal, titi, tang, ping, 12, ṡaṡih, ka daṡa, iṡaka warșa, 1907. Tinḍun mwah de Cakraning Kṛșṇa, ring rahina, Ra, Wa, Warighā, ṡaṡih, kalima, iṡaka warșa, 1936. Masehi, 16 Nopember 2014.