Pura Segara Kenjeran

Pura Segara Kénjéran (aksara Bali: pura​sĕgara​keñjreran·) silih tunggil pura sané magenah ring Kota Surabaya, Jawa Timur, tepat ipun ring Kalurahan Kénjéran, Kecamatan Bulak, sané magenah ring tengah kompléks TNI Angkatan Segara Kénjéran.

Pura Segara Kénjéran ꦦꦸꦫ​ꦯꦼꦒꦫ​ꦑꦺꦚ꧀ꦗꦺꦫꦤ꧀
Inpormasi umum
Tipe	Pura
Pakem Undagi	Jawa-Bali
Genah	Kenjeran, Bulak, Surabaya, Jawa Timur
Margi	Jl. Memet Sastrowiryo No. 1 A, Komp, Kenjeran
Koordinat	7°14′17″S 112°47′26″E
Kaaranin antuk	Segara
Ngawit kawangun	15 Januari 1980
Pinanggal inagurasi	17 Juli 1981

Pura Segara kanikayang manados linggih Ida Sang Hyang Widhi Wasa, sané maplawatan dados Déwa Baruna, ring Hindu nusantara punika manados bhatara sané magenah ring segara. Kaadegang ring warsa 1981, wangunan irika campuhan undagi Jawa miwah Bali antuk nuansa Hindu tengah nyané. Piodalan ipun kamargiang ring Purnama Kapat.

Lelintihan

Pawangunan "Pura Segara" kakawitin ring panguntat Januari warsa 1980, sasampun kamedalang ijin wangunan saking Pangdaeral IV, Laksamana Muda TNI Gatot Suwardi No. B/15/04/20/9/tanggal 15 Januari 1980 ring tanah sané linggahnyané 80 M X 60 M utawi linggahnyané 480 m². Panentuan kosala kosali medasar antuk pituduh saking Ratu Ida Pedanda Putra Telaga saking Griya Banjarangkan Klungkung, Bali. Wewidangan pura kawangun antuk 3 (tiga) mandala, inggih punika Mandala Utama sané madaging Padmasana, Balé Pemiosan, Pengurah. Madya Mandala madaging Apit Surang, Kori Rong Tiga miwah Balé Kulkul. Wangunan punika kakaryanin saking bahan cetakan olih para pengrajin sané kabakta saking désa Kapal, Kabupatén Badung, Bali. Ring tanggal 17 Juli 1981, pura punika kapelaspas tur karesmiang olih Panglima Daerah IV sané magenah ring Surabaya, Bapak Laksamana Muda Gatot Suwardi. Pura Segara boya ja pahan saking Tri Kayangan sakéwanten wantah aran kemanten duaning duk punika kadasarin antuk genah sané nampek sareng pasih/segara. Pangawitnyané pura puniki matetujon majeng para krama Hindu sané magenah ring Komplék AL TNI Kénjéran lan sawewengkonnyané (21 kulawarga). Ring pangelimbakan ipun, sané mangkin wénten 92 kulawarga sané nyungsung pura niki. sané kakepah antuk 5 (limang) sektor/témpék. Silih tunggil Penglingsir Pura Segara sané kantun aktif inggih punika Prof. Nyoman Sutantra miwah Laksamana TNI (Purn) IGN. Sebudhi. Panglimbakan jimbar wawidangan Pura Segara

• Tahap I 60 x 80 M (4800 M²)
• Tahap II, 65 x 85 M (5200 M²) pajimbaran Pura
• Tahap III, 175 x 140 M (24.500 M²) pajimbaran Pura
• Tahap IV, 130 x 40 M (5200 M²) lahan parkir.

Jimbar makasami Pura Segara 37.700 m²

Pangelimbakan

1. Pawangunan Sekolah Saraswati/Pasraman, antuk wantuan jinah saking Banpres Nomor. Keputusan Presiden sane No. 154/B/1986 tanggal 7 Mei 1986
2. Ring warsa 1993 kalaksanayang renovasi/pajimbaran sane ageng rumasuk ngegeser pelinggih sané pacang kasesuaiang antuk kosala - kosali lan pewangunan Kori Agung antuk dukungan anggaran Rp. 150.000.000,- (satus seket yuta Rupiah) akehan dana (sbs. Rp. 86.000.000.) kapolihang saking ngawentenang dana "Malem Pesona Dewata" ring gedung Go Skate Surabaya. sane kakawitin tur katuntun olih Manggala Kejaksaan Tinggi duk punika Bapak "Nyoman Suwanda SH". Ring tanggal 31 Oktober 1993 renovasi sampun puput tur kaplaspas.
3. Ring warsa 1995-1996 pawangunan Gedong Pasimpenan miwah Balé Gong sané mapangarga Rp. 40.000.000,-
4. Warsa 1997 - 2000 Pawangunan pawaregan miwah ngamecikang sekolah Saraswati antuk prabéa 49 yuta.
5. Ring warsa 2000 kawentenan pawangunan Wantilan Agung “Dewa Ruci” antuk rencana anggaran Rp. 2,3 Miliar. Wit dana saking kegiatan sasolahan seni (kaping tiga), sinalih tunggil donatur inggih punika Bapak Walikota Surabaya, Bapak Bambang DH lan Ibu Risma, saking Walikota Dénpasar, Bapak IB.Rai Mantra. Yadiastun durung jangkep 100%, Wantilan Agung "Dewa Ruci" prasida kaanggén makudang-kudang kegiatan krama Hindu ring Surabaya lan kegiatan mahasisya Hindu ring Surabaya.
6. Ring warsa 2002, Karya Mahakarya “Ngenteg Linggih” puniki kalaksanayang olih nem ratu peranda saking Bali miwah petang diri saking Jawa Timur, sané sampun nelasang prabéa Rp. 450 yuta

Acara

1. Pacentokan ngias Penjor puniki kasarengin olih para sisya miwah sekaa truna-truni ring sajebag kota Surabaya miwah sawewengkonnyané, pinaka dudonan parikrama piodalan.
2. Pangarakan ogoh-ogoh olih mahasisya tur truna truni pura ritakala arahina sadurung rahina Nyepi
3. Upanayana Mahasisya Hindu (Panyelenggara PHDI Kota Surabaya) .
4. Parikrama pelatihan majeng ring para wasi ring sejebag Jawa Timur (Panyelenggara PHDI Prop. Jawa Timur)

Pangempon

Krama pengempon pura puniki para kulwarga Hindu TNI AL sinarengan kulawarga Hindu sané meneng ring nampekan pura. Siosan punika kaempon olih para mahasisya, santukan manampekan sareng makudang kampus Paguruan Tegeh Negeri lan Swasta minakadi ITS, Unair, Untag, Unitomo, Itats, Stikom, UHT, Ubaya, WK msl. Pura puniki dados genah mapupul tur maparilaksana para Mahasisya Hindu ring Surabaya.