Pura Panca Tirta Nongan

Pura Panca Tirta Nongan inggih punika genah panglukatan ring Banjar Bujaga, Kecamatan Rendang, Kabupatén Karangasem. Kawéntenan pura miwah genah panglukatan iriki sampun sué saking 1953. Panglukatan punika mawasta Pura Panca Tirta mawinan madué limang pancoran tur nunas tamba saking limang mata air sané malianan. Limang pancoran taler madué pawiguna sané malianan. Pura Panca Tirta nika taler mabinayan duaning tirta langsung kapasupati olih Ida Ratu Gedé Balian Sakti. Ring ajeng palinggih Ida Ratu Gedé Balian Sakti taler wénten batu pangayatan Ida Bhatari Gangga mapaiketan langsung sareng pancoran utama. Ring sisi kelod wénten kalih pancoran Ida Bhatara Sri Rambut Sedana.

Dudonan malukat

Sasampun rauh ring Pura Tirta Nongan, pamedek matur piuning antuk banten pejati. Pamedek taler nyurat wastan ring acarik kertas sané pacang kaanteb jro mangku antuk pinunas sakadi nunas tamba, jodoh, leteh mala, miwah sané lianan. Sasampun ngaturang bhakti miwah piuning pacang ngawit malukat ring pancoran Ida Ratu Gedé Balian Sakti. Kaping kalih ring pancoran Ida Bhatari Gangga. Lantur ka sisi kelod ring makakalih pancoran Ida Bhatara Sri Rambut Sedana. Kaping untat ring pancoran nampek campuhan nunas karahayuan. Yéning sampun wusan malukat, magentos antuk panganggé sané tuh tur pacang nunas wangsuh pada tirta miwah bija. Ring Pura Panca Tirta Nongan taler sampun wénten genah masalin tur mararian ajebos.

• 
• 
• 
• 
•