Pura Masceti Tegalalang

Pura Mascéti Tegallalang inggih punika silih tunggil pura subak sané magenah ring Désa Tegallalang, Kecamatan Tegallalang, Kabupatén Gianyar Bali. Pura puniki magenah ring sisi kangin Pura Desa lan Puseh Desa Adat Tegallalang. Pura Masceti ngranjing ring soroh pura swagina utawi pura profesi inggian punika swagina sané maiketan ring persawahan sekadi petani, pekaseh, miwah sané lianan. Duaning ngranjing ring sorohan pura swagina, Pura Masceti puniki pinaka genah para petani utawi pekaséh nunas karahayuan utawi kaselametan ring saluiring tetanduran mangda prasida kadohang saking marana tur sida mupu nyabran warsa.

Wewangunan ring Pura Masceti puniki kawangun nganutin Tri Mandala inggih punika Utama Mandala utawi Jeroan Pura, Madya Mandala utawi jaba tengah pura, miwah Nista Mandala utawi jaba sisi Pura. Makudang-kudang palinggih wénten ring wewidangan Utama Mandala sekadi balé pelik, palinggih gedong panyimpenan, palinggih meru tumpang telu, miwah sané lianan.

Pura Masceti Tegallalang kaamong lan kaempon olih krama subak inggian punika Subak Sukabaya, Subak Langkih, Subak Umadalem, Subak Telunayah, miwah Subak Kraman. Maka lima subak-subak puniki masikian dados subak sané mapeséngan Subak Gedé Langkih Tegallalang sané pinaka panyungsung Pura Masceti punika. Pura Masceti yening imbayang pinaka pura pamucuk utawi pura utama subak-subak ring Desa Tegallalang. Pujawali ring pura puniki kalaksanayang nyabran purnama sasih Kadasa utawi nyabran 420 dina apisan sané kasanggra olih saka siki sekaa subak malarapan antuk parikrama sané magiliran. Duk warsa 2020 ring Pura Masceti Tegallalang kamargiang karya Padudusan Agung sané pinaka upacara pinih ageng ring pura puniki. Upacara sekadi padudusan agung kalaksanayang nyabran 25 warsa utawi 50 warsa apisan. Duk karya padudusan agung warsa 2020 punika lianan kasanggra antuk maka sami krama subak taler kasarengin antuk krama Desa Adat Tegallalang.