Pura Kahyangan Tiga
Pura Kahyangan Tiga utawi katah taler kauningin pinaka Kahyangan Desa wantah pura sane kaanggen genah panyungsungan krama wawengkon desa pakraman. Pura Kahyangan Tiga kawangun antuk tiga pura, inggih punika Pura Desa pinaka genah panyungsungan Sang Hyang Brahma, Pura Puseh pinaka genah panyungsungan Sang Hyang Wisnu lan Pura Dalem sane kaanggen nyujur ida Sang Hyang Siwa. Kawentenan Pura Kahyangan Tiga puniki pinaka cihna krama adat ring Bali sapisanan ngiket sahananing krama adat majalaran antuk awig-awig.[1]
Lelintihan Pura Kahyangan Tiga
uahSaking rihin, Pura Kahyangan Tiga puniki kawangun madasar antuk pikenoh sane kakawitin olih Mpu Kuturan sane ngulati pisan jagi nyikiang kawentenan krama adat ring Bali. Manut kapustakaan sane karipta olih Ktut Soebandi, Mpu Kuturan wantah silih sinunggil jawatan sane wenten ring Kerajaan Bali, inggih punika dados kasinangkemin pinaka senapati. Mpu Kuturan sane kasengguh ring ajeng wantah Mpu Rajakertha sane rauh saking Jawa dwipa ring Saka Warsa 923 utawi 1001 Masehi. Ida pinaka senapati ring Bali sane magelar Pakiran-Kiran I Jro Makabehan.[2] Ida lunga ka Bali maduwe tatujon nagingin uleman Raja Ratu Sri Gunapriya Dharmapatni Dharmodayana Warmadewa pinaka senapati tur mecikang sapamargi adat miwah agama ring Bali.[3]
Duk punika krama Baline kasukat-sukat antuk paksa sane mabinayan. Kramane wenten sane nganutin paksa Siwa Siddhanta, Pasupata, Bhairawa, Waisnawa, Bodha, Brahma, Resi, Sora miwah Ganapatya. [4] Mangda nenten wenten biyota utawi pikobet ring kramane, saking punika ida ngawentenang pasamuan agung ring Pura Samuan Tiga ring Saka Warsa 923 utawi 1001 Masehi. Saking pasamuane punika kasinangkemin sareng angga pasamuane kapolihang asil indik tata titi maagama sane prasida nyikiang krama baline, inggih punika nganggen konsep Tri Murti sakadi sane sampun munggah ring Lontar Usana Dewa. Asil pesamuane puniki pinaka dasar krama adat ring soang-soang desa pakraman sayuakti ngawangun Pura Kahyangan Tiga iwau.
Kapustakaan
uah- ↑ Suadnyana, Ida Bagus Putu Eka. "Desa Pakraman Sebagai Lembaga Adat dan Lembaga Agama Bagi Kehidupan Masyarakat Hindu di Bali". Dharma Duta: Jurnal Penerangan Agama Hindu. 18: 21–32.
- ↑ Soebandi, Ktut (2018). Riwayat Merajan di Bali. Denpasar: CV. Kayumas Agung. ISBN 978-979-617-067-8.
- ↑ Tonjaya, I Nyoman Gd. Bendesa K. (1991). Riwayat Empu Kuturan. Denpasar: RIA.
- ↑ Dewi, Luh Kartika; Oktaviani, Ni Putu Sinta; Arsadi, Putu Eka. "Ketuhanan dalam Siwa Siddhanta". Widya Darsana. 2: 72–82.