Pura Bedugul

Pura Bedugul utawi Pelinggih Dugul inggih punika pura-pura alit sané ketah kapanggihin ring wewidangan subak miwah ketahnyané magenah nampek sareng toya. Pura Bedugul kakaryanin olih krama pangempon subak antuk petak-petak carikné soang-soang. Pura Bedugul wantah genah suci antuk para krama subak ngaturang banten ring dudonan upakara subak.

Silih tunggil Pura Bedugul ring Tegalalang, Gianyar

Kawigunan Pura Bedugul

Kawéntenan Pura Bedugul manut krama subak kaprecaya manifestasi Déwi Sri pinaka penguasa wewidangan carik. Pura Bedugul kaanggén wates petak tanah olih krama subak soang-soang. Kawigunan religi Pura Bedugul inggih punika kaanggén palaksanan upacara yadnya (ngusaba) sané kaprecaya olih krama prasida nyaga padi sané sampun gading saking sakancan hama.

Pura Bedugul wantah pura subak sané kantun berstatus pura swagina. Pura Bedugul ring paiketannyané sareng kahuripan krama Bali wantah pawigunan gumi miwah toya. Pura Bedugul pinaka bagian saking sistem pemujaan ring konteks Tri Hita Karana, inggih punika paiketan krama subak sareng Ida Sang Hyang Widhi Wasa miwah wewidangan subak.

Pura Bedugul puniki mapusat sareng nilai kesuburan. Dewa Wisnu (toya) pinaka cihna kesuburan umat manusa. Dewi Danu (toya) taler nyihnayang kesuburan. Dewi Sri taler pinaka cihna kesuburan.

Makna Teologi Pura Bedugul

Makna teologi pura Bedugul inggih punika makna Widdhi Sraddha wantah precaya indik kawéntenan Ida Sang Hyang Widhi Wasa sané menguasai carik. Cihna bhuana agung inggih punika kawéntenan palinggih padmasana pinaka cihna jagat gumi. Makna sosial inggih punika wangunan pura wantah genah krama subak nglaksanayang persembahyangan sareng-sareng antuk tetujon mangda ngamolihang kasukertan jagat. Pura Bedugul wantah cihan sthana utawi lingga sané kaanggén genah muspa Ida Sang Hyang Widhi Wasa sané ngicénin karahayuan.