Patung Bunda Maria Assumpta

Patung Bunda Maria Assumpta inggih punika patung pangarcanan Bunda Maria pinaka Theotokos sane kaindargamayang sampun ngamolihang genah sane becik tur kaangkat nuju swarga loka. Yening kacingak antuk kasuksman etimologi kruna assumpta ngranjing saking basa Latin sane mawit saking kruna assumere maduwe kasuksman "muatang majeng deweknyane pedidi" Punika macihna wantah Bunda Maria kaambil antuk putran idane pareragan, inggih punika Yesus Kristus. Punika patungnyane kasobyahang sakadi gumanti lunga ka swarga loka. Yening selehang malih saking katattwane, Gereja Katolik sampun netapang ketattwane puniki saking Paus Pius XII rikala ngamargiang Konstitusi Apostolik Munificentimus Deus tur katetapang duk pinanggal 1 Nopember 1950.

Kawentenan Doktrin Maria Assumpta

Nganutin sapunapi drsta sane wenten ring Gereja Katolik, sami prasida kacingak ring Tradisi Suci. Ring kawentenane mawiwit saking tulisan Apokrif sane mamurda Transitus Mariae. Rerehang malih ring satuane, wenten rasul sane mawasta Santo Thomas. Ida kautus antuk nginjil ring sawengkon India. Riantukan doh pamargine, ida tan uning sapunapi kahanan sane wenten ring Yerusalem. Nenten kauningin, wantah Bunda Maria sane wenten ring Yerusalem mantuk maring sunia loka. Nenten panjang paitungan, Santo Tomas ngunjar saking India rauh nuju Yerusalem, ragane prasida nyingakin bangbangan Bunda Maria tur sampun ngamolihang bangbangan idane sampun nenten wenten napi-napi. Kacingak ring tengahing bangbangan wantah wastran idane kemanten.

Saking caritane punika ring Gereja Katolik micayang pinget ring Bunda Maria sane gagelaran ida pinaka Bunda Allah punika, pinaka Maria Assumpta. Ragane embas nenten kabobotin antuk karma wasana sane kaon tur nenten papa pangembasan idane. Sangkaning pasuecane punika, ida seda nenten wenten wadagne malih, samaliha moksa kawentenan idane nenten wenten papa sane neket ring angga sariran Bunda Maria.