Nganggung
Nganggung inggih punika tradisi sane wenten ring kauripan krama Kota Pangkalpinang, Bangka Belitung. Tradisi puniki kacirenin antuk para kramane makta ajengan jangkep ka genah patemon ageng. Nganggung punika taler ketah kasengguh Sepintu Sedulang sane artosnyane siki umah (siki pintu) makta sadulang (siki dulang), dulang punika wadah seng utawi kuningan sane kaanggen antuk nagingin ajengan jangkep sakadi darang, jaja miwah woh wohan taler katutup olih tudung saji sane ketahnyane mawarna barak miwah mamotif.
Ketahnyane tradisi Nganggung puniki kalaksanayang ritatkala upakara keagamaan antuk krama Muslim sakadi Maulid Nabi Muhammad SAW, Nisfu Sya'ban, Muharram taler Idul Fitri miwah Idul Adha. Lianan punika, ketahnyane kalaksanayang ring Masjid, Surau, utawi ring Langgar.[1]
Kawigunan uah
Tradisi Nanggung puniki kakawitin olih ngwacen doa miwah ceramah agama sane matema manut sareng Nganggung sane kalaksanayang. Tradisi puniki pinaka wentuk semangat gotong-royong kramane. Tetujonnyane mangda ngiket tali silaturahmi para kramane mangda prasida rukun miwah damai. Lianan punika, tradisi puniki taler mawiguna pinaka sarana nguningayang miwah ngajahin tradisi majeng ring para yowanane.[2]
Dudonan uah
Ketahnyane dulang utawi genah antuk nyusun ajengan utawi dulang sane malakar saking timah, kuningan, utawi kayu. Ring pahan krama Bangka, 'dulang' taler kasengguh 'talam'. Ring ajeng dulang utawi talam puniki kaatur piring-piring sane madaging ajengan, sakadi nasi miwah darang, woh-wohan utawi jaja. Salanturnyane, dulang utawi talam punika katutup olih tudung saji sane kakaryanin saking don mengkuang (pandan alas) utawi don purun. Wentuknyane wenten sane mawentuk masjid utawi candi.
Nanging wenten taler krama sane nganggen tudung saji sane malakar saking plastik. Ajengan sane sampun kasusun kabakta ka masjid, surau, miwah bale desa. Cara makta dulang utawi talam sane madaging ajengan punika kagenahang ring ajeng tapak tangan miwah maktannyane setegeh pundak. Dulang taler prasida kabakta nganggen tangan sane jerijinnyane mabukak ring ajeng sirah.
Sadurung dulang utawi talam kabakta ka masjid, surau, utawi bale desa, wenten beduk khusus utawi takok-takok ngantos tigang tahap getokan nganggen irama sane khusus. Dulang utawi talam sane rauh pinih ajeng kaatur ring barisan sane ajeng, salanturnyane kasusul sareng dulang-dulang salanturnyane. Sadurung tudung saji kabukak kalaksanayang pawacenan doa olih penghulu utawi pamuka agama. Sasampunnyane kalanturang antuk ngajeng sinarengan.[3]
Pustaka uah
- ↑ "Nganggung". Wonderful Pangkalpinang (ring Inggris). Kaaksés 2024-02-25.
- ↑ "Tata Cara dan Manfaat Tradisi Nganggung dari Bangka Belitung". kumparan (ring Indonesia). Kaaksés 2024-02-25.
- ↑ Media, Kompas Cyber (2022-10-26). "Mengenal Tradisi Nganggung dari Bangka Belitung: Pengertian, Tata Cara, dan Makna Halaman all". KOMPAS.com (ring Indonesia). Kaaksés 2024-02-25.