Museum Perjuangan Tridaya Eka Dharma

Museum Tridaya Eka Dharma inggih punika silih tunggil museum sané magenah ring jalan Panorama No. 24, Kelurahan Kayo Kubu, Kecamatan Guguk Panjang, Bukittinggi. Museum puniki karesmiang olih Mohammad Hatta ring tanggal 16 Agustus 1973. Museum puniki madué makudang-kudang ratus senjata ri tatkala galah maperang. Museum puniki dados karauhin olih para kramané.

Museum Perjuangan Tridaya Eka Dharma

Lelintihan

Museum puniki sadurungnyané inggih punika genah masandekan Gubernur Sumatra. Museum puniki kaadegang krana wénten idé saking Brigjen Widodo, silih tunggil pimpinan TNI wewengkon Sumatra Tengah. Pikayunan punika salanturnyané kalanturang olih Brigjen Soemantoro tur karesmiang dados museum ring tanggal 16 Agustus 1973. Museum puniki kawastanin Museum Perjuangan Tridaya Eka Dharma, sané artosnyané tigang unsur kekuatan siki pangabdian. Wasta puniki taler maiketan sareng palsapah Minang inggih punika "Tigo Tungku Sajarangan". Museum puniki kaadegang dados sarana komunikasi para generasi tur dados cihna utsaha miwah nilai-nilai kapahlawanan. Kota Bukittinggi katunjuk dados genah kaadegang museum puniki krana kota Bukittinggi naenin dados genah ibu kota propinsi Sumatra tur ibu kota negara Républik Indonésia ring galah Pamerintahan Darurat Républik Indonésia (PDRI).

Koléksi

Ring Museum Perjuangan Tridaya Eka Dharma wénten makudang-kudang sarana sejarah, sakadi senapan laras sané lantang, senapan laras sané éndép, meriam, amunisi, granat, sarana paerang, pamancar radio, alat antuk ngamolihang sinyal, telpun, miwah panganggé para tentara Indonésia miwah tentara asing. Lianan saking punika, wénten taler gambar-gambar ri tatkala maperang sakadi gambar kapemimpinan para jendral, genah panyekepan para pahlawan, miwah gambar para présidén Indonésia ring warsa 1945 ngantos warsa 2004.

Ring sisi museum wénten taler Pesawat Terbang AT-16, Harvard B-419 sané kakaryanin olih Amérika Serikat sané sadurungnyané kaanggén antuk ngicalang Pamerintahan Repolusionér Républik Indonésia ring Sumatra Tengah ring warsa 1958, sané kaoprasiang ring Solok, Indarung, Bukittinggi miwah Payakumbuh. Sasampunnyané puput galah terbangnyané, pesawat punika kagenahang ring depotlogistik ring Lanud Husseun Sastra Negara ring Bandung olih Staf Angkatan Udara. Salanturnyané, ring warsa 1973 kaserahang ka Museum Tridaya Eka Dharma antuk kadadosang benda koléksi.