Lukat geni
Lukat geni
|
Lukat geni inggih punika tradisi sané kamargiang ring krama Puri Satria Kawan, Paksebali, Kecamatan Dawan, Klungkung. Tradisi puniki sampun mamargi saking nguni pateh sakadi siat pandan utawi makaré-karé ring Tenganan. Lukat Geni inggih punika silih tunggil siat sané nganggén api. Api kakaryanin saking danyuh pinaka sanjata. Danyuh punika kaiket makatah 36 katih. Raris para trunané mapasangan saling gebug nganggén api sané kakaryanin saking danyuh maiket sané apinyané ngendih. Api punika sané kasiatang ring awak timpal lianan. Sadurungé ngelaksanayang tradisi lukat geni puniki, makasami pamilet sané jagi nyarengin miwah api sané kanggén masiat kaupacarain riin.
Kruna lukat maarti ngicalang sakancan mala ring angga. Geni punika maarti api. Upacara lukad geni puniki matetujom ngicalang sakancan mala sané wénten ring angga sarira. Lukat geni masuksma nunas panglukatan ring Sang Hyang Brahma. Pangaptiné mangda angga sarirané bresih, suci, jagaté trepti, landuh sekala miwah niskala.
Punika mawinan lukat geni puniki kamargiang ri kala pangrupukan, arahina sadurung hari raya nyepi ri kala tilem sasih kasanga. Lukat geni puniki ketah kemargiang ring catus pata désa Paksebali utawi ring Madya Mandala Merajan Agung Puri Satria Kawan.[1]. Lukat geni mamargi ri kala para trunané nyuryakang ogoh-ogoh. Lukat geni kairingang antuh tabuh bleganjur sané ngawinang sang sané nyarengin gargita pisan. Nénten wénten pamilet sané matatu risampuné siat puniki wusan, yadiastun siaté nganggén api.
Pustaka
uah
