Aksara Latin
     

Pura Besakih (aksara Bali: pura​bĕsakiḥ) inggih punika pinaka puser purané ring Bali. Pura Besakih punika silih tunggil pura Sad Kahyangan ring Bali. Pura punika magenah ring bongkol Gunung Agung, Désa Besakih, Kecamatan Rendang, Kabupatèn Karangasem. Para sameton Hindu Bali tan lali pedek tangkil ri nuju piodalan miwah pangusaban ring Pura Besakih.

Pura Besakih
Pura Besakih
Peta
Inpormasi umum
TipePura
Pakem UndagiBali
GenahDésa Besakih, Kecamatan Rendang, Karangasem, Bali
MargiBesakih, Rendang, Karangasem, Bali 80863
KoordinatKoordinat: 8°22′28″S 115°27′03″E / 8.374368°S 115.450936°E / -8.374368; 115.450936
Estimasi puputAbad ka-15
Situs web
www.besakihbali.com

Pura Besakih pinaka pura pinih ageng ring Bali saha madué palebahan kirang langkung tiga likur. Yening rereh saking kota Denpasar dohnyané nem dasa kilometer, pamarginé nglintang kota Gianyar miwah Klungkung. Saking kota Klungkung ngalerang malih kalih likur kilometer. Pura Besakih punika pinaka puser purané ring Bali, makagenah nyiwi Ida Sang Hyang Widhi. Pamucuk genahé tan seos wantah Pura Panataran Agung. Genah natar purané mapanta-panta wénten pitung panta makalambang sapta patala. Pujawali ring Pura Panataran Agung kamargiang nyabran rahinan Purnama Kapat. Ring Panataran Agung wénten Padma Tiga pinaka linggih Ida Sang Hyang Tri Purusa utawai Sang Hyang Siwa Tiga minakadi Batara Siwa, Sadasiwa, miwah Parama Siwa.

Sajaba punika, nyabran rahinan Purnama Kadasa kawéntenang pujawali sané kawastanin pujawali Batara Turun Kabeh. Ri tatkala punika makasami umat Hinduné patutu pedek tangkil ngaturang pangubakti. Sajaba punika, satunggil dasa warsa taler kawéntenang pangaci sané kabaos Tawur Panca Walikrama. Yening sampun satus warsa kawéntenang malih Tawur Eka Dasa Rudra. Tawur Eka Dasa Rudra sané pinih untat sampun kamargiang duk Tileming Cetra Isaka warsa 1900, tanggal masehi 28 Maret 1979.

Sadurung ngranjing ka Panataran Agung Besakih, ring jabaan wénten wangunan anyar sané mawasta Mandapa Kesari Warmadewa, genah pasamuan agama minakadi pasamuan agung miwah mahasabha Hindu Dharma. Ring asapunapiné taler kanggén genah mararian sarwi nabdabang raga jagi pedek tangkil ka pura. Wewangunan pura Besakih sané ageng tur unik prasida pinaka silih tunggil objek wisata budaya ring Bali sané akeh katuju antuk para wisatané. Sajaba punika, genah Pura Besakih punika wiakti kalintang ngangobin sang ngatonang. Ri kala terang baskarané nenten kaliputantuk sayong, katon Gunung Agungé, gunung sané pinih luhur ring Bali, kakayonan madianing gunung katon gadang lom ngulangunin pesan. Yening macecingak saking ngawewehin kaasriannyané, sané prasida nudut kayung para turisé rauh ka Besakih. Katahmalih yéning baosang indik kautamannyané tan samen ring jagaté. Makasami umat Hinduné nenten purun lempas, mautsaha pedek tangkil ri nuju pujawali utawi pangusaban ring Pura Besakih.

Galeri uah

Pustaka uah