Logo inggih punika gambar utawi sekadar skétsa antuk artos katentu, miwah ngawakilin satunggil artos saking pautsahan, daérah, organisasi, produk, negara, lembaga, miwah paindikan liyanan sané ngapidartayang sinunggil sané singkat miwah aluh kaingetin manados panggentos saking nama sujatiné.

Logo patut madué tattwa miwah kerangka dasar marupa konsép antuk tatujon ngembasang sifat sané maadeg ngeraga utawi mandiri. Logo langkung kaloktah olih pacingakan utawi visual, sekadi cecirén khas marupa warna miwah rupa logo punika.

Logo madué 5 indik sané patut kadagingin. Luiré:

  1. Kasatuan (mahubungan)
  2. Dominasi (daya kedeng)
  3. Irama (makesinambungan)
  4. Proporsi (becik kacingak)
  5. Kaseimbangan (sama)

Logo sané becik prasida ngawakilin produk utawi pustahaan miwah aluh kaingetin.