Taman Mini Indonesia Indah

Taman Mini Indonesia Indah (TMII) inggih punika silih tunggil wewidangan taman wisata sané nyusung tema budaya Indonésia ring Jakarta Timur. Jimbarnyané kirang langkung 150 héktare utawi 1,5 kilométer persegi magenah ring koordinat 6°18′6.8″LS,106°53′47.2″BT. Taman puniki marupa pupulan kebudayaan krama Indonésia, pahannyané saking kahuripan krama ring 26 propinsi Indonésia (duk warsa 1975) sané kasobyahang antuk anjungan daerah maarsitektur purwa, taler nyobyahang sarwa busana, igel-igelan, miwah tradisi daerah. Sané lianan, ring tengahing TMII wénten danu asiki sané nyritayang miniatur pulo Indonésia ring tengahnyané, kereta gantung, makudang-kudang museum, miwah Téater IMAX Kéong Mas lan Téater Tanah Airku), sarwa sarana malancaran puniki ngawinang TMIII pinaka silih tunggil wewidangan wisata sané kasub ring ibu kota.