Krarus inggih punika taru-taruan sané tumbuh ring masan panes sané tegehnyané kirang langkung 75–90 cm. punyan punika medué ubi sané dados kaajeng olih manusa. Punyan Krarus punika madué cecirén sakadi, carangnyané akéh warnin ipun gadang, donnyané asiki-asiki, bunter lantang, muncuknyané lanying, pangkalnyané bunder, sisinnyané asah, petulangannyané menyirip, langtangnyané kirang langkung 10–27 cm, don puniki kakepah miwah mabulu sané warnin ipun gadang. Punyan krarus punika sekarnyané akéh, wentuknyané maijengan, klopak ring sekar puniki mawarni gadang, pucuk miwah sarinyané malekétan,warninnyané putih, miwah muncuk sarinyané mawarni kuning tur putih. Punyan krarus punika medué buah sané wentuknyané kotak, bunter mawarni gadang. Akah ring punyan puniki masrabutan sané warnin ipun putih daki. Kawigunannyané punika wantah dados ubad méncrét, rématik miwah radang usus. Antuk ubad méncrét kaanggén kirang langkung 25 gram krarus, lablab antuk agelas toya sané suényané kirang langkung 15 menit, salanturnyané peres. Asil peresannyané icénin setengah gram tasik laut aduk, salanturnyané inem.[1][2]

Suratan uah

  1. Departemen Kesehatan Républik Indonésia. Inventaris Tanaman Obat Indonésia Jilid I. Jakarta, 2000.
  2. ""Ilmu Pertanian Agroteknologi", Klasifikasi dan Morfologi Tanaman Garut". Kaarsipin saking versi asli tanggal 2019-05-26. Kaaksés 2019-05-26.