Kanda Pat Raré

Kanda Pat Raré inggih punika peséngan para semeton sané satata nyarengin sang maraga raré turmaning maparagayan sakala miwah niskala. Semeton inucap pacang ngraksa sang maraga raré saking kantun ring cecupu manik kantos ipun muputang swadharmannyané ngmargiang kahuripan ring marcapada. Sané kasengguh kanda pat raré wantah patpat kawéntenannyané inggih punika; yéh nyom, rah, lamas, miwah ari-ari. Makapatpat semeton inucap ring kahanan sakala wantah nyarengin sang maraga raré ri kala embas.

Kanda Pat Raré
Wikipustaka
Aran liyanan	kanda​pat·​rar̥
Soroh	Wariga
Kawedar kapertama ring	Wanagiri
Basa(-basa)	Basa Kawi
Lakaran	Lontar
Ukuran	18,5, 29,8, 22,3, 30, 37,8, 40,3, 42,8, 48,5 miwah 40 cm x 2,8, 2,9, 3,5, 3, 3,4 miwah 3,3 cm
Aksara	Aksara Bali
Ngranjing Koleksi ring	Wanagiri, Sawan miwah Kemenuh
Klasifikasi Gedong Kirtya	Wariga

Sang maraga raré sané wawu embas turmaning kasarengin olih makapatpat semetonnyané sané kasengguh Kanda Pat Raré

Yéning kaselehin saking kahanan niskala, Kanda Pat Raré inucap taler madué peséngan sané matios-tiosan manut ring yusan sang maraga raré. Rikala sang raré kantun ring cecupu manik, peséngan semetonnyané inggih punika Babu Lembana, Babu Abra, Babu Ugian/Sugian, miwah Babu Kakéré. Risampunné sang Ibu mobot sia bulan turmaning sang maraga raré sampun medal, raris makapatpat semeton inucap magentos peséngan manados Sang Anta (ari-ari), Sang Preta (lamas), Sang Kala (rah), miwah Sang Dengen (yéh nyom). Salanturnyané, ri kala sampun mayusa awarsa, makapatpat semeton sané nyarengin inucap pacang ninggalin sang maraga raré turmaning malih magentos peséngan manados I Salahir/I Jelair (ari-ari), I Mokair (lamas), I Mekair (rah), miwah I Salabir (yéh nyom). Inggihan pamargin Sang Kanda Pat Raré inucap inggih punika I Salabir lunga nganginang, I Mekair lunga ngelodang, I Salahir/I Jelair lunga ngauhang, miwah I Mokair lunga ngalérang. Pamekasnyané, ritepengan makapatpat semeton sang maraga raré inucap sampun rauh ring genah sané katuju, raris malih magentos peséngan manados I Bhuta Anggapati (yéh nyom), I Bhuta Mrajapati (rah), I Bhuta Banaspati (ari-ari), miwah I Bhuta banaspati Raja (lamas).

Yadiastun sampun ninggalin sang sané maraga raré, makapatpat semeton sané kasengguh Kanda Pat Raré punika kantun ngraksa sang maraga raré sairing nincapang kahuripan turmaning pacang nodya ri kala kamargiang upakara sakadi dedinan, otonan, menék kelih, pawiwahan, miwah sahananing upakara manusa yadnya satmaka dados swadharmaning sang maraga semeton.

Cingak taler

• Kanda Pat
• Kanda Pat Sari
• Kanda Pat Déwa
• Kanda Pat Manusa
• Kanda Pat Bhuta

Pranala jaba

• Kanda Pat Raré ring YouTube